लिभरपुल (एजेन्सी)– लिभरपुलका स्टार मोहम्मद सालाह अहिले विश्वकै उत्कृष्ट खेलाडी भएको क्लबका महान खेलाडी स्टेफन जेरार्डले बताएका छन् । सालाहको उच्च प्रदर्शनबाट प्रेरित लिभरपुलले मंगलबार राती च्याम्पियन्स लिग सेमिफाइनलको पहिलो लेगमा रोमालाई ५–२ ले हराएको थियो ।

रोमाविरुद्ध २ गोल गरेका इजिप्टियन स्टारले यो सिजन सबै खेलमा गरि ४३ गोल गरिसकेका छन् । क्लबका लागि रोबेर्टो फेर्मिनाले २ र साडियो मानेले १ गोल गरेका थिए । घरेलु मैदानमा सानदार जितपछि योर्गन क्लबको टोलीले च्याम्पियन्स लिग फाइनल पुग्ने सम्भावनालाई बलियो पारेको छ । यद्दपी टोलीले रोमाको मैदानमा अग्रतालाई जोगाउने चुनौतिको सामना गर्नुपर्नेछ ।

सन् २००५ मा लिभरपुलले च्याम्पियन्स लिग उपाधि जित्दाका कप्तान समेत रहेका जेरार्डले साहालको तारिफ गर्ने क्रमा अहिलेको समयका उत्कृष्ट खेलाडी भएको बताए । उनले सालाहलाई आफ्नो फर्मलाई कायम राख्न पनि सल्लाह दिएका छन् ।

‘उनी खेल जीवनको उच्च फर्ममा छन् । सालाहलाई क्रिस्टियानो रोनाल्डो र लियोनल मेस्सीसँग तुलना गर्न कठिन हुन्छ , किनकि उनीहरुले लामो समयदेखि एकरुपताको प्रदर्शन गरिरहेका छन्,’ उनले भने, ‘तर, छायाँमा नपरि अहिलेको समयमा साहाल विश्वकै उत्कृष्ट खेलाडी हुन् ।’

सालाह प्रिमियर लिगको यो सिजनका उत्कृष्ट खेलाडी हुन् । हालै मात्र उनी पिएफए प्लेयर अफ दी अवार्डबाट सम्मानित भएका थिए । च्याम्पियन्स लिगमा पनि उनको प्रदर्शन उत्कृष्ट रहँदै आएको छ । लिभरपुललाई च्याम्पियन्स लिग उपाधि दिलाउन सके साहाल बालोन डी ओरका दाबेदार बन्न सक्नेछन् ।