काठमाडौं (हाम्रो खेलकुद)– यसै महिना रुसको मस्कोमा हुने स्ट्रिट चाइल्ड वल्र्डकप– २०१८ मा सहभागिता जनाउन लागेको नेपाली टोलीको मंगलबार जर्सी सार्वजनिक गरिएको छ ।

वेस्टार प्रर्टिजका मालिक अक्षय गोलियान, कोकाकोला कम्पनीको तर्फबाट स्नेह राजभण्डारी, एनएमबी बैंकका रोमन झा, सनराइज बैंककी सदीक्षा आचार्य तथा कप्तान रोशन भूजेलले नेपाली टोलीको जर्सी सार्वजनिक गरे ।

मुख्य प्रायोजक ललितपुरको बालकुमारीस्थित वेस्टार प्रर्टिज रहेको छ । कार्यक्रममा बोल्दै मुख्य प्रायोजक बेस्टार प्रोपटिजका संचालक गोलियानले नेपाली टोलीलाई प्रायोजन गर्न पाउँदा गर्व महसुस भएको बताए ।

सडकमा जिवन विताउन बाध्य भएका बालबालिकालाई आवाश, शिक्षा, खानपिन लगायतको कार्य गर्दै आएको सेल्टर आश्रय नेपालको सक्रियतामा नेपालले पहिलोपटक सडक बालबालिकाको विश्व कपमा भाग लिन लागेको छ ।

सेल्टर आश्रय नेपालले सडक बालबालिकाहरुको राष्ट्रिय लिग सञ्चालन गरेर खेलाडी छनोट गरेको थियो । रुस जाने नेपाली टिममा रोशन भुजेल, एरोन कार्की, पवन शाही, सचिन विश्वकर्मा, विशाल वादी, सन्तोष खत्री, मनविर लामा, विकास तिमल्सिना र रमेश शाह तेली छन् ।

उनीहरुलाई राजन न्यौपानेले प्रशिक्षण दिइरहेका छन् भने गोलकिपरको प्रशिक्षण नवीन महर्जनले सम्हालेका छन् । नेपाली टिम आइतबार देखि बन्द शिविर प्रशिक्षणमा बसेका छन् । दुई साता एन्फा कम्प्लेक्सको मैदानमा प्रशिक्षण गरेपछि नेपाली टोली मस्को प्रस्थान गर्नेछ । स्ट्रिट चाइल्ड वल्र्डकप बैशाख २६ देखि जेठ ४ गतेसम्म हुदैछ ।