म्यानचेस्टर (एजेन्सी) – इंग्लिस प्रिमियर लिग अन्तर्गत बर्नमाउथविरुद्ध २-० को जितमा पल पोग्बाले उत्कृष्ट खेल पस्किए । तर यो सबका बाबजुद प्रशिक्षक जोसे मोउरिन्हो पोग्बाको व्यवहार देखेर रुष्ट बने ।

पोग्बाले खेलमा उत्कृष्ट प्रदर्शन गरेसँगै प्रशिक्षक जोसे मोउरिन्होले उनलाई ८० औं मिनेटमा परिवर्तन गरे । पोग्बाले बेन्चमा आउने क्रममा केहि प्रशिक्षण टोलीका सदस्यसँग हात मिलाए तर मोउरिन्होलाई वास्ता नगरी बेन्च छाडेर ड्रेसिङ रुमतर्फ लागे । मोउरिन्हो उनको यो व्यवहार देखेर रिसाए र पोग्बालाई तुरुन्त बेन्चमा फिर्ता आउन भने । प्रशिक्षकको आदेश अनुसार पोग्बा केहि क्षणमै बेन्चमा फर्किए ।

खेलपछि पोग्बा म्यान अफ द म्याच भएको सोध्दा मोउरिन्होले मुख बंग्याउँदै उनको प्रशंसामा केहि शब्द खर्चिए । ‘पोग्बाको प्रदर्शन राम्रो थियो । सिटीविरुद्धको खेलमा पनि पोग्बाले राम्रो खेलेका थिए । म् म्यान अफ द म्याच कसलाई दिने भन्नेमा दखल राख्दिन तर यो राम्रो निर्णय हुनुपर्छ,’ मोउरिन्होले भने ।

गत साता वेस्ट ब्रोमसँग युनाइटेड पराजित भएपछि म्यानचेस्टर सिटीले उपाधि जित्ने पक्का भएको थियो । उक्त खेलमा युनाइटेडको प्रदर्शन निकै खराब रहेको थियो । पल पोग्बाले वेस्ट ब्रोमविरुद्ध गरेको प्रदर्शनलाई लिएर पल स्कोल्सले पनि आलोचना गरेका थिए । स्कोल्सले बुधबार भने उनको प्रशंसा गरे । ‘यदि पोग्बालाई आजजस्तो प्रदर्शन सबै खेलमा दिने हो भने उनी विश्वकै उत्कृष्ट खेलाडी बन्नेछन्,’ स्कोल्सले भने ।