लण्डन (एजेन्सी) – प्रोफेसनल फुटबलर्स असोसियसन (पिएफए) ले आज प्रिमियर लिगको ‘टिम अफ द इयर’ सार्वजनिक गरेको छ । प्रिमियर लिगको उत्कृष्ट खेलाडीहरु सम्मिलित टोलीमा च्याम्पियन टोली म्यानचेस्टर सिटीबाट सर्वाधिक ५ खेलाडी रहेका छन् । त्यस्तै टोटनह्यामबाट ३ खेलाडी रहेका छन् भने म्यानचेस्टर युनाइटेड, लिभरपुल र चेल्सीबाट १-१ खेलाडी उत्कृष्ट ११ मा परेका छन् ।

पिएफए टिम अफ द इयर:

गोलकिपर

डेभिड डे गेया (म्यानचेस्टर युनाइटेड)

यस सिजन म्यानचेस्टर युनाइटेडका स्पेनिस गोलकिपर डे गेया उत्कृष्ट लयमा छन् । ३३ खेल खेलिसक्दा उनले सर्वाधिक १६ ‘क्लिन सिट’ राखेका छन् । यस सिजन उनका केहि बचाउहरुले विश्वभरिका विश्लेषक र समर्थकलाई अचम्मित बनाएको पनि छ ।

डिफेन्स

कायल वाकर (म्यानचेस्टर सिटी) – जान भर्टोनघेन (टोटनह्याम) – निकोलस ओटामेन्डि (म्यानचेस्टर सिटी) – मार्कोस अलोन्सो (चेल्सी)

यस सिजन प्रिमियर लिग च्याम्पियन म्यानचेस्टर सिटीले १४ ‘क्लिन सिट’ राख्न सफल भएको छ । ‘टिम अफ द इयर’मा सिटीका दुई डिफेन्डर सम्मिलित भएका छन् – निकोलस ओटामेन्डि र कायल वाकर । यी दुई खेलाडी सिटीको सिजनभरि सर्वाधिक खेल खेलेका दुई डिफेन्डर पनि हुन् । ओटामेन्डीले ४ गोल गरेका छन् भने वाकरको ६ असिस्ट पनि रहेको छ ।

त्यस्तै ओटामेन्डीलाई मध्य डिफेन्समा टोटनह्यामका जान भर्टोन्घेनले साथ दिएका छन् । १३ ‘क्लिन सिट’ राख्न सफल भर्टोन्घेन लिगमा तेस्रो उत्कृष्ट टोटनह्यामको डिफेन्सको मुख्य खेलाडी रहेका छन् । त्यस्तै डिफेन्सको बायाँतर्फ चेल्सीका विंग ब्याक मार्कोस अलोन्सो रहेका छन् । रक्षात्मकभन्दा पनि आक्रामक खेलका लागि चिनिने अलोन्सोले यस सिजन ६ गोल प्रहार गरिसकेका छन् ।

मिडफिल्ड

डेभिड सिल्भा (म्यानचेस्टर सिटी) – केभिन डि ब्रुयन (म्यानचेस्टर सिटी) – क्रिस्टियन एरिक्सन (टोटनह्याम)

‘टिम अफ द इयर’ को मध्यपंक्तिमा पनि म्यानचेस्टर सिटीका दुई खेलाडी रहेका छन् – केभिन डि ब्रुयन र डेभिड सिल्भा । थियरी हेनरीको सिजनभरि २० असिस्टको रेकर्ड तोड्न नजिक रहेका डि ब्रुयनको यस सिजन १५ असिस्ट रहेको छ । त्यसैगरी सिटीको मिडफिल्डको रचनात्मक जिम्मेवारी बोकेका अर्को महत्त्वपूर्ण खेलाडी रहेका हुन् डेभिड सिल्भा । सिल्भाको यस सिजन ८ गोल र ११ असिस्ट रहेको छ । टिम अफ द इयरको मध्यपंक्तिमा टोटनह्यामका एरिक्सन पनि रहेका छन् । टोटनह्यामका लागि यस सिजन लिगमा उनले ११ गोल र ९ असिस्ट गरेका छन् ।

फरवार्ड

मोहम्मद सालाह (लिभरपुल) – ह्यारी केन (टोटनह्याम) – सर्जियो अगुएरो (म्यानचेस्टर सिटी)

यस सिजन लिभरपुलका मोहम्मद सालाह जादुयी लयमा रहेका छन् । सबै प्रतियोगितामा ४० गोल गरेका सालाहको लिगमा ३० गोल र ९ असिस्ट रहेको छ । सालाहको यस सिजनको प्रदर्शनले उनलाई लियोनल मेस्सी र क्रिस्टियानो रोनाल्डोकै तुलनामा उभ्याएको छ ।

त्यसैगरी अग्रपंक्तिमा टोटनह्यामका ह्यारी केन पनि रहेका छन् । केनले अघिल्लो दुई सिजनमा लिगको गोल्डेन बुट जितेका थिए भने अघिल्लो सिजन युरोपियन गोल्डेन बुट जितेका थिए । यस सिजन प्रिमियर लिगमा गोल्डेन बुट जित्न भने उनी सालाहभन्दा ५ गोलले पछाडी रहेका छन् ।

फरवार्ड लाइनको तेस्रो स्थानमा अगुएरो रहेका छन् । अगुएरोले लिगमा केनभन्दा ८ सय मिनेट र सालाहभन्दा ६ सय मिनेट कम खेले पनि तेस्रो सर्वाधिक २१ गोल गरेका छन् । अहिले घाइते रहेका अगुएरो सिजनको अन्त्यभन्दा अघि फर्किने भने अनिश्चित रहेको छ ।