पोखरा (हाम्रो खेलकुद)– आयोजक लालीगुँरास युवा क्लब (एलजी) को रेड टोलीले दोस्रो एलजी कप सेभेन ए साइड फुटबल प्रतियोगिताको उपाधि जितेको छ । अमरसिंह मैदानमा शनिबार भएको फाइनलमा एलजी रेडले आफ्नै क्लबको ब्ल्याकलाई २–० ले हराउँदै उपाधि जितेको हो ।

विजेता टोलीले १ लाख ५० हजार र दोस्रो हुने टोलीले ८० हजार रुपैयाँ प्राप्त गर्यो । त्यसअघि शनिबार नै भएको सेमिफाइनलमा एलजी रेडले भंगारढिकको आदर्श युवा क्लबलाई २–१ र एलजी ब्ल्याकले लेकसाइड युवा क्लबलाई टाइब्रेकरमा ३–२ ले हराउँदै फाइनलमा भेट पक्का गरेका थिए ।

लेकसाइडबाट वाक ओभर पाएपछि आदर्श प्रतियोगिताको तेस्रो टोली बन्यो । टोलीले २० हजार लेकसाइडल े १० हजार रुपैयाँ प्राप्त गर्यो ।
एलजी ब्ल्याकका गोविन्द थापा प्रतियोगिताका सर्वोत्कृष्ट खेलाडी घोषित भए भने एलजी रेडका अजित गुरुङ १२ गोलसहित उच्च गोलकर्ता बने । गोविन्द र अजितले समान ८ हजार रुपैयाँ प्राप्त गरे ।

एलजी रेडका शुलेमान थापा मगर उत्कृष्ट रक्षक, एलजी रेडका दिप कार्की उत्कृष्ट गोलकिपर, एलजी ब्ल्याकका शिन्केमान तामाङ उत्कृष्ट र एलजी रेडका प्रविण गुरुङ प्रशिक्षक र एलजी रेडका विशाल गुरुङ (माइला) उत्कृष्ट व्यवस्थापक चुनिए । उत्कृष्ट सबैले जनही ४ हजार रुपैयाँ प्राप्त गरे ।

हिमाअश एजुकेशन कन्सलटेन्सीले मुख्य प्रायोजन गरेको प्रतियोगिताको दोश्रो पुरुस्कार ८० हजार रुपैयाँ एन्फा कास्कीका अध्यक्ष मिलन गुरुङले प्रायोजन गरेका थिए । चैत २३ गते बाट संचालन भएको उक्त प्रतियोगितामा ६४ टोलीले प्रतिस्पर्धा गरेको प्रतियोगिताका संयोजक एवम् संस्थाका कोषाध्यक्ष सुमन गुरुङले जानकारी दिए ।

नेपाली सेना पश्चिम पृतनाका सहायक पृतनापती तारा बिक्रम शाह, पश्चिमाञ्चल क्षेत्रिय खेलकुद बिकास समितीका उपाध्यक्ष सुनिल गुरुङ, लोकतान्त्रिक खेलकुद संघ जिल्ला अध्यक्ष याम बस्नेत, एन्फा कास्की अध्यक्ष मिलन गुरुङ, युवा व्यवसायी महेन्द्र गुरुङ, मुख्य प्रायोजक संस्था हिमाअशका प्रोप्राइटर समिर थापा र आयोजक एलजीका अध्यक्ष डम्बरजंग गुरुङलगाएतले विजेता, उपविजेता टोलीका खेलाडीलाई पुरस्कृत गरे ।