काठमाडौं (हाम्रो खेलकुद) – नेपाली महिला फुटबल खेलाडीको उच्च प्रदर्शनबाट प्रेरित पुलिस क्लब माल्दिभ्समा जारी १८/३० महिला फुटसल फिस्टाको फाइनलमा पुगेको छ । दुई नेपाली खेलाडी सावित्रा भण्डारी र अनिता बस्नेतको गोलले टिम फेनाकालाई बिहीबार ५–२ ले हराउँदै पुलिस क्लब अन्तिम दुईमा पुगेको हो ।

अनिता बस्नेत र सावित्रा भण्डारी (दायाँ) । फाइल तस्बिर

सावित्राले ह्याट्रिक र अनिताले २ गोल गरेपछि पुलिसको जित पक्का भएको थियो । अब सोमबार हुने फाइनलमा पुलिस क्लबले एमपिएलको सामना गर्नेछ । सोही दिन एमपिएलले कस्टमआरसीलाई १०–१ ले हराउँदै फाइनल यात्रा तय गरेको थियो ।

पुलिसका लागि अनिताले पहिलो र अन्तिम गोल गरेकी थिइन् भने सावित्राले त्यसबीचमा ह्याट्रिक पुरा गरेकी थिइन् । अनिताले पहिलो गोल २८ औं र व्यत्तिगत दोस्रो गोल ६० औं मिनेटमा गरिन् । सावित्राले ३ मिनेटमा ह्याट्रिक पुरा गरेकी थिइन् । ४७ औं मिनेटमा २ गोल गरेकी सावित्राले ५० औं मिनेटमा अर्को गोल थरेकी थिइन् ।

यसअघि कस्टम आरसीलाई ९–१ ले हराउँदा सावित्रा र अनिता दुवैले ह्याट्रिक गरेका थिए । त्यो खेलमा सावित्राले ५ र अनिताले ४ गोल गरेकी थिइन् । सावित्राले यो सिजन टोलीका लागि खेलेका सबै ५ खेलमा गोल गरेकी छिन् । प्रतियोगितामा सावित्राको १९ र अनिताको ८ गोल पुगेको छ ।

माल्दिभ्समा सावित्रा र अनिताको यो दोस्रो सिजन हो । गत सिजन उनीहरुले माल्दिभ्स एयरपोर्ट कम्पनीबाट खेलेका थिए । दक्षिण एसियाकी उत्कृष्ट स्ट्राइकर मध्येकी एक सावित्रा गत वर्ष सोही प्रतियोगितामा उत्कृष्ट खेलाडी घोषित भएकी थिइन् । सावित्राले गत वर्ष प्रतियोगितामा ४ खेलमा १३ गोल गरेकी थिइन् ।

क्विन अफ दी म्याचको अवार्ड ग्रहण गर्दै सावित्रा भण्डारी ।