दिपक बोहोरा
पाँचथर (हाम्रो खेलकुद) – न्यु स्टार सुनसरी वाइ वाइ दोश्रो नाइन ए साइड पाँचथर गोल्डकपको उपाधि नजिक पुगेको छ । मिसन युनाइटेड ताप्लेजुङलाइ ३–० ले हराउदै न्यु स्टारले फाइनल यात्रा तय गरेको हो ।

फिदिम माविको मैदानमा भएको खेलमा न्युस्टारलाई जित दिलाउन सुशिल राईले २ र टंक बस्नेतले १ गोल गरे । न्यु स्टारले रेडहर्स इलाम र विर्ता युनाइटेडको विजेतासँग फाइनल खेल्नेछ ।

त्रिभुवन आर्मीका ४ खेलाडी उतारेको न्यु स्टार खेलभर हावी रह्यो । आर्मीका दीपक गुरुङ , पदम तामाङ , जितेन्द्र कार्की र टंक बस्नेतले न्यु स्टारबाट खेलेका थिए । मिसनले पनि झापाका स्टार खेलाडी कर्ण लिम्बु , खमिर गिल्सन कन्दङ्वा र दीपक राईलाई उतारेपनि खेल जित्न सकेन ।

खेलको २९ औं मिनेटमा टंकले गोल गर्दै न्यु स्टारलाई अग्रता दिलाएका थिए । निशान लिम्बुको क्रसमा टंकले गोल गरेका हुन् । सुशिलले ५३ औंं मिनेटमा गोल गर्दै अग्रतालाई दोब्बर पारेका थिए । सुशिलले हेमन्त थापा मगरको पासमा गोल गरेका हुन् । सुशिलले ६७ औं मिनेटमा अर्को गोल थपे ।

विपक्षी खेलाडीलाई फाउल गरेपनि टंक रातो कार्ड पाउँदै मैदान बाहिरिएपछि न्यु स्टार ८ खेलाडीमा सिमित भएको थियो । मिसनका कर्ण र दीपक सोचे अनुरुप चल्न नसक्दा न्यु स्टार खेलमा हावी रह्यो । न्यु स्टारका सुशिल खेलको म्यान अफ दी म्याच घोषित भए र उनले ५ हजार रुपैयाँ प्राप्त गरे ।

मिसनका प्रशिक्षक डिके मादेनले आश गरेका खेलाडी नचल्दा र पाएका अवसर गुमाउँदा पराजित हुनु परेको बताए । खेलाडीको आपसी समन्वय मिलेका कारण सफलता मिलेको न्यु स्टारका प्रशिक्षक श्याम मानन्धरले बताए ।

पाँचथर गोल्डकपमा शुक्रबारको दोस्रो सेमिफाइनल
रेडहर्स इलाम विरुद्ध विर्ता युनाइडेड झापा