म्याड्रिड (एजेन्सी)– च्याम्पियन्स लिग क्वार्टरफाइनलको दोस्रो खेलमा युभेन्ट्सका खेलाडीले पेनाल्टीको प्रतिवाद गरेको आफुले नबुझेको रियल म्याड्रिडका सुपर स्टार क्रिस्टियानो रोनाल्डोले बताएका छन् । इन्जुरी समयको तेस्रो मिनेटमा लुकासलाई पेनाल्टी बक्समा फाउल गरेपछि रियलले पेनाल्टी पाएको थियो ।

जसको चर्को प्रतिवाद गरेका कारण युभेन्ट्सका गोलकिपर जियालुजी बुफोनले रातो कार्ड दर्शन गर्दै मैदान छोड्नु परेको थियो । त्यो पेनाल्टीमा रोनाल्डोले विना कुनै गल्ति गोल गरे । जसका कारण रियल लगातार आठौं पटक च्याम्पियन्स लिग सेमिफाइनलको यात्रा तय गरेको छ ।

३–० ले पछि परेको खेलको अन्तिम समयमा पाएको पेनाल्टीमा गोल गरेपछि रियल अन्तिम चारमा पुगेको थियो । पहिलो लेगमा ३–० को जित हासिल गरेको रियल बुधबार रातीको खेलमा भने ३–० ले पछि परेको थियो । मारियो मान्डजुकिको २ र ब्लासिया मातुदीको गोलमा युभेन्ट्सले ३–० को अग्रता बनाएपछि समग्रमा खेलमा ३–३ को बराबरीमा पुगेको थियो । त्यस्तो अवस्थामा रियलले पाएको पनाल्टीमा गोल गरेपछि युभेन्ट्स प्रतियोगिताबाट बाहिरिएको थियो ।

रोनाल्डोले पेनाल्टी दिनुलाई सहि निर्णय भएको बताएका छन् । ‘किन त्यो पेनाल्टीमा प्रतिवाद गरियो मैले बुझ्न सकेको छैन । यदि त्यो फाउल हुन्थेन भने लुकासले गोल गर्थे । उनलाई पछाडिबाट हानिएको छ,’ स्पेनिस टेलिभिजनलाई दिएको अन्तवार्तामा रोनाल्डोले भने,‘ बेनाटिया र अन्य खेलाडीले हामीलाई पटक पटक पछाडीबाट हानेका थिए । त्यो उनीहरुको खेल हो । हामी सेमिफाइनल पुगेका छौं र त्यसमा खुसी छौं ।’

यो सिजन ला लिगा उपाधि जित्ने सम्भावना लगभव समाप्त भएपछि रियलले च्याम्पियन्स लिगको उपाधि रक्षा गर्न आफुलाई केन्द्रित गरेको छ । रियललाई उपाधिको मुख्य दाबेदारका रुपमा हेरिएको छ ।