म्याड्रिड (एजेन्सी) – युएफा च्याम्पियन्स लिगको क्वार्टरफाइनलको दोस्रो लेगमा साविकको विजेता स्पेनिस क्लब रियाल म्याड्रिड र साविकको उपविजेता इटालियन क्लब युभेन्टस् भिड्दैछन् ।

खेल राति १२ः३० बजेपछि रियाल म्याड्रिडको घरेलु मैदान सान्टियागो बर्नाबेउमा हुदैछ । युभेन्टस्को घरेलु मैदानमा भएको पहिलो लेगमा रियलले ३–० को सहज जित निकालेको थियो । अवे मैदानमै ३–० को सहज जित निकालेको रियाल घरेलु मैदानमा पनि सोही नतिजा दोहोर्याउने लक्ष्यमा मैदान उत्रनेछ । रियाललाई पहिलो लेगमा दुई गोलसहित एक गोलको लागि अवसर सिर्जना गरिदिएका सुपरस्टार क्रिष्टियानो रोनाल्डोको साथ छ ।

रोनाल्डोले युभेन्टसविरुद्ध पहिलो लेगमा बाइसाइकल किकमार्फत गरेको दर्शनीय गोल साताभरिनै चर्चित भएको थियो । च्याम्पियन्स लिगमा उच्च प्रदर्शन गर्दै आइरहेको रोनाल्डोले लगातार १० खेलमा गोल गर्ने कीर्तिमान पनि बनाएका थिए । यसबाहेक रियलसँग ग्यारेथ बेल र करिम वेन्जेमा जस्ता स्टार खेलाडीको साथ छ । यस खेलमा पनि जित हात पार्दै रियाल सेमिफाइनल पुग्ने लक्ष्यमा हुनेछ । रियाललाई कप्तान सर्जियो रामोसको साथ हुनेछैन । रामोस दोहोरो पहेँलो कार्डको कारण प्रतिबन्धमा छन् ।

यता, युभेन्टस् घरेलु मैदानमा बेहोरेको हारको बदला लिने लक्ष्यमा मैदान उत्रनेछ । युभेन्टस् रियालको अग्रपङ्तिको खेलाडीलाई रोक्दै गोल गर्ने अभियानमा हुनेछ । तर, रियालविरुद्धको खेल सोचेजस्तो सहज भने हुनेछै । युभेन्टस्लाई फाइनलमा प्रवेश गर्न रियाललाई ४–० को स्पष्ट नतिजामा पराजित गर्नुपर्ने हुन्छ । जुन असम्भव जस्तै छ । तर, बुधबार राति अर्काे इटालियन क्लब एएस रोमाले बार्सिलोनाको ४–१ को अग्रता उल्ट्याएर सेमिफाइनलमा प्रवेश गर्न सफल भएको थियो ।

युभेन्टस्सँग गोनजलो हिग्विन, जियानलुजी बुफोन, जर्जियो चिलियानी, एलेक्स सान्ड्रो र सामी खेडिराको साथ रहँदा पाउलो डिब्यालाको साथ भने गुमाउनेछ । डिब्यालाले रियालविरुद्धको खेलमा रातो कार्ड पाएका थिए