एएफसी कपमा रोहितको पर्सिजालाई सहज जित

जकार्ता (एजेन्सी) – एएफसी कप अन्तर्गतको समूह चरणको खेलमा रोहित चन्द सम्मिलित पर्सिजा जकार्ताले मलेसियन सुपर लिग विजेता जोहोर दाहुल ताजिमलाई ४-० ले पराजित गरेको छ। रोहितले निर्धारित ९० मिनेट खेलेका थिए।

मंगलबार भएको खेलमा पर्सिजाको जितमा क्रोएसियाका फर्वार्ड मारको सिमिकले सबै ४ गोल गरे। खेलको ८ औं मिनेटमा घरेलु टोलीलाई अग्रता दिलाएका सिमिकले १२ औं, १९ औं र ८७ औं मिनेटमा गोल गरेका थिए। भ्रमणकारी टोलीका अडाम नोर अज्लिनले ७८ औं मिनेटमा दोहोरो पहेलो कार्डको सामना गरेपछि ताजिम १० खेलाडीमा सिमित भएको थियो।

यसअघि समूह चरणको खेलमा ताजिमले आफ्नो घरेलु मैदानमा पर्सिजालाई ३-० ले पराजित गरेको थियो। पर्सिजा ५ खेलमा ३ जित र १ बराबरीसँगै १० अंकको साथमा समूह ‘एच’ को शिर्षस्थानमा छ। दोस्रो स्थानमा भियतनामको एसएलएनएको पनि १० अंक छ।