रोम (एजेन्सी) – च्याम्पियन्स लिग क्वाटर फाइनलमा पहिलो लेगको ४-१ को स्पष्ट अग्रतालाई गुमाउँदै बार्सिलोना च्याम्पियन्स लिगबाट बाहिरिएको छ। बार्सिलोनाको घरेलु मैदानमा ४-१ ले पछि परेको एएस रोमाले दोस्रो लेगमा ३-० को सनसनीपूर्ण पुनरागमन गरेपछि समग्रमा ४-४ को नतिजा बनाउँदै रोमा च्याम्पियन्स लिगको सेमिफाइनलमा स्थान बनाउन सफल भयो। 

दुई लेगमा ४-४ को बराबरी भएपनि अवे गोलको आधारमा रोमाले बार्सिलोनालाई पछि पारेको हो। रोमाले बार्सिलोनाको घरेलु मैदानमा १ गोल गर्दा बार्सिलोनाले भने रोममा कुनै गोल गर्न नसकेपछि बार्सिलोना च्याम्पियन्स लिगबाट बाहिरिने पक्का भएको हो।

रोमाका सेन्टर ब्याक कोस्टाभ मानोलासले ८२ औं मिनेटमा निर्णायक गोल गर्दै सेमिफाइनलमा स्थान पक्का बनाए। त्यसअघि इडेन जेकोले छैटौं मिनेटमा गोल गर्दै रोमालाई अग्रता दिलाएका थिए। दोस्रो हाफमा ५८ औं मिनेटमा द्यानिली डी रोस्सीले पेनाल्टी मार्फत गोल गर्दै रोमाको पुनरागमनको आधार बनाएका थिए। बार्सिलोनाका डिफेन्डर जेरार्ड पिकेले जेकोलाई फौल गरेपछि रोमाले पेनाल्टी पाएको थियो।

रोमाबिरुद्ध बल पोजिसनमा पकड जमाएपनि बार्सिलोनाले गोल फर्काउन नसक्दा क्वाटरफाइनलबाटै बाहिरिन पुग्यो । अन्य खेलमा लिभरपुलले म्यानचेस्टर सिटीलाई २-१ ले हराउँदै सेमिफाइनलमा स्थान पक्का गर्यो। पहिलो लेगमा ३-० को अग्रता बनाएको लिभरपुलले समग्रमा ५-१ को जित हासिल गर्यो।