म्युनिख (एजेन्सी)– जर्मन गोलकिपर मानुयल नुयोरका लागि यो सिजन दुःखत रह्यो । राष्ट्रिय टोली र बायर्न म्युनिखका लागि प्रदर्शन गर्ने अनुमती चोटले उनलाई दिएन । तर, सिजनको अन्त्यतिर आइपुग्दा उनी विश्व कपका लागि फर्कने संकेत भने देखिएको छ ।

बायर्न र जर्मनीका समर्थकले चोटमुक्त भएर फर्कने उनलाई यो सिजनभरी पर्खिनै रहे । समर्थकको चाहना ढिलै भएपनि पुरा भएको छ, ३२ वर्षे उनी अभ्यासमा फर्केको तस्बिर जर्मन च्याम्पियन क्लबले सार्वजनिक गरेको छ । उनी गोलकिपरको पन्जासहित अभ्यासमा सामेल भएका छन् ।

झन्डै छ महिनामा उनी अभ्यासमा फर्केका छन् । सेप्टेम्बरको मध्ययता उनी क्लब र राष्ट्रिय टोलीमा खेल्न सकेका थिएनन् । सेप्टेम्बरमा मानिजलाई बायर्नले ४–० ले हराउँदा पुरा समय पोष्ट सम्हालेको नुयोर त्यसयता मैदान बाहिर छन् । पछिल्लो अप्रिलमा उनको बायाँ खुट्टा भाचिएको थियो ।

पछि अभ्यासका दौरान उनको त्यहि खुटामा पुनः चोट लाग्यो । पछि उनले शल्यक्रिया नै गराउनु परेको थियो । सुरुवातमा उनी जनवरी सम्म मैदान बाहिर रहनु पर्ने अनुमान गरेपनि, चोट मुक्त हुन त्यो भन्दा लामो समय पर्खनु परेको थियो । तर विस्तारै भएपनि उनी पूर्ण रुपमा फिट भएर फर्कने क्रममा छन् ।

बुन्डेसलिगामा अब अन्तिम चरणमा पुगेको छ । जर्मनका नम्बर १ गोलकिपर रसियामा दुई महिना भन्दा केहि पछि सुरु हुने विश्व कपका लागि भने पूर्ण रुपमा फिट हुने अपेक्षा गरिएको छ । उनको कप्तानीमा जर्मनीले विश्व कपको उपाधि रक्षा गर्ने अपेक्षा गरिएको छ । उनको अनुपस्थितिमा स्भेन उल्रिचले क्लबको पोष्ट सम्हालेका थिए ।

बार्यन लागातार छैटौं वर्ष बुन्डेलिगा च्याम्पियन बन्ने क्रममा रहेको छ । अन्तिम ६ खेलमा एउटा खेल जितेपछि बार्यन च्याम्पियन बन्नेछ । यो सिजन टोलीले च्याम्पियन्स लिगको सेमिफाइनलका लागि पनि सम्भावना बलियो बनाएको छ । सेभिल्ला विरुद्धको पहिलो लेग अवे खेलमा टोलीले २–१ को जित दर्ता गराइसकेको छ ।