रोम (एजेन्सी)– सिरि ‘ए’ महारथी युभेन्ट्सले एट्लेटिको म्याड्रिडका स्टार एन्टोनियो ग्रिजमन भित्राउन बार्सिलोनासँग प्रतिस्पर्धा गर्ने सम्भावना बढेको छ । छ पटकको इटालियन च्याम्पियनले नयाँ सजिनका लागि फ्रान्सेली युवा स्ट्राइकर भित्राउने लक्ष्य राखेको सञ्चारमाध्यमहरुले उल्लेख गरेका छन् ।

ग्रिजमनले यो सिजनको अन्त्यसँगै एट्लेटिको छोड्ने लगभग निश्चित जस्तै भएपछि बार्सिलोनाले पनि उनीमाथि चासो देखाउँदै आएको छ । च्याम्पियन्स लिग क्वार्टरफाइनलको पहिलो लेगमा मंगलबार रियल म्याड्रिडसँग पराजित भएको युभेन्ट्सले आफ्नो आक्रमणलाई अझै चुस्त बनाउन २७ वर्षे ग्रिजमनलाई भित्राउने योजना बनाएको हो ।

ग्रिजमनले क्लबले छाड्ने निश्चित भएपछि उनलाई भित्राउन क्लबहरुबीच प्रतिस्पर्धा चल्ने निश्चित छ । त्यसमध्ये बार्सिलोना एक हो । म्यानचेस्टर युनाइटेडले भने ग्रिजमन भित्राउने योजना स्थगित गरिसकेको छ । युनाइटेडका प्रशिक्षकले जाजे माउरिन्होले जारी सिजनमा रियल सोसिडाडका पूर्व खेलाडीलाई भित्राउन इच्छा राखेका थिए ।

तर, रुमेलु लुकाकु र अहिले पछिल्लो पटक एलेक्स सान्चेजलाई भित्राएपछि माउरिन्होले पुरानो योजना छाडेका छन् । विश्व फुटबलमा ग्रिजमन शीर्ष आक्रमक खेलाडी मध्ये एक मानिन्छन् । यदि युभेन्ट्स उनलाई लान सफल भएमा युभेन्ट्सको पनि अग्रपक्ति युरोपियन क्लबमध्येको शसक्त हुने विश्वास लिइएको छ ।