म्युनिख (एजेन्सी)– रियल म्याड्रिडबाट लोनमा बायर्न म्युनिख पुगेका हामेस रोड्रिगेजले यो सिजन त्यहाँ प्रभावशाली प्रदर्शन गरिरहेका छन् । टोलीका प्रशिक्षक जेप हेन्केस पनि उनको प्रदर्शनबाट प्रभावित छन् । जसका कारण क्लबले पनि उनलाई स्थायी रुपमै आबद्ध गराउने संकेत गरेको छ ।

सन् २०१४ को विश्व कपमा उच्च प्रदर्शन गरेपछि मोनाकोबाट रियल म्याड्रिडले उनलाई भित्राएको थियो । कार्लो एन्सेलोटीले रियल सम्हाल्दा उनी टोलीका महत्वपूर्ण सदस्य थिए । तर जिनेदिन जिदानले टोलीको प्रशिक्षक सम्हालेपछि हामेसले कमै मौका पाउन थाले ।

स्पेनमा दुई वर्ष संघर्ष गरेपछि दुई वर्षको लोनमा रोड्रिगेज म्युखिन पुगेका थिए । उनको सम्झौता सकेपछि बायर्नलाई स्थायीय रुपमा आबद्ध गर्ने सम्भावना बढेको छ । ‘ उनी म्युखिन र बायर्नमा खुसी छन्,’ हेन्केसले सोमबार भने,‘ मलाई लाग्छ उनी अर्को वर्ष वा त्यो भन्दा पनि रहन सक्छन् । उनलाई कहिले खरिद गर्ने भन्ने निर्णय क्लबले गर्नेछ । ’

सुरुआती दिनमा भन्दा रोड्रिगेज टोलीमा अभ्यस्त भइसकेको प्रशिक्षक हेन्केसले बताएका छन् । ‘अहिले उनी शारीरिक रुपमा पनि सहि अवस्थामा छन् । हरेक खेलाडीले आफ्नो उच्चतम दिने प्रयास गर्छन्,’ उनले भने,‘ उनीसँग मेरो धेरै विषयमा छलफल भएको छ । अहिले उनको मनोबल उच्च छ । उनको प्रदर्शनले पनि त्यसलाई प्रमाणित गर्दछ । शारीरिक र टेक्निकल रुपमा पनि उनी फरक खेलाडी बनेका छन् ।’

बायर्नले पछिल्लो साता बारुसिया डर्टमन्डलाई ६–० ले हराउँदा रोड्रिगेजले गोल गर्नुका साथै अरु एसिस्ट गरेका थिए । बायर्नले आज राती च्याम्पियन्स लिग क्वार्टरफाइनलको पहिलो लेगमा सेभिल्लासँग प्रतिस्पर्धा गर्नेछ ।