टुरिन (एजेन्सी) – क्लब फुटबलको सबैभन्दा ठुलो प्रतियोगिता युएफा च्याम्पियन्स लिगको क्वार्टरफाइनलका खेलहरु आजबाट सुरु हुँदैछन् ।

आज राति साविक विजेता स्पेनिस क्लब रियल म्याड्रिडले साविक उपविजेता इटालियन क्लब युभेन्टसको सामना गर्दा अर्काे स्पेनिस क्लब सेभियाले जर्मन क्लब बायर्न म्युनिखको आतिथ्यता गर्दैछ । अघिल्लो वर्षको फाइनलको पुनरावृत्ति हुने रियल र युभेन्टसको खेल युभेन्टसको घरेलु मैदान टुरिनमा हुँदैछ ।

युभेन्टसका डिफेन्डर जर्जियो केलिनीले क्वार्टरफाइनलको पहिलो लेगमा रोनाल्डोलाई गोल गर्नबाट रोक्न आवश्यक रहेको बताएका छन् । ‘रोनाल्डोले यो सिजनको पछिल्ला ८ खेलमा १२ गोल गरिसकेका छन् । हामी विरुद्धको खेलमा रोनाल्डोलाई रोक्दै खेलभरी उनको नजिक रहन जरुरी छ ।’

केलिनीले भने, ‘रोनाल्डोलाई रोक्न सकेनौं भने खेल हाम्रो पक्षमा हुने छैन, हामीले रोनाल्डोलाई कसरी रोक्ने भनेर योजना बनाइरहेका छौं र रोनाल्डोलाई रोक्न सक्षम हुनेमा विश्वास्त छौं । तर, जित र हार खेलको एक पाटो हो भन्ने हामीले बुझेका छौं ।’

यस्तै केलिनीले रोनाल्डोले रियलमा पछिल्लो समय गज्जबको प्रदर्शन गरिरहेको बताए । ‘हामी घरेलु मैदानमा रियलविरुद्ध हाम्रो गुणस्तरको खेल पस्कँदै रियललाई पराजित गर्ने लक्ष्यमा हुने छौं । रियल पनि राम्रो टोली हो । कार्डिफको सकरात्मक र नकरात्मक घट्नालाई बिर्सँदै खेल्नेछौं ।’

केलिनीले थपे, ‘तर हामीले रियललाई सम्मान गर्नै पर्ने हुन्छ । हामीले रियललाई पराजित गर्न सकिंदैन भनेको हैन । यदि हामी च्याम्पियन्स लिगको फाइनलमा पुग्नुछ भने रियलले अघिल्लो वर्षको फाइनलमा खेलेको जस्तो खेल खेल्नुपर्दछ ।’

‘कार्डिफ र टुरिनबीचको खेल पक्कै पनि फरक हुनेछ । हामी आत्मविश्वासी भएर सकारात्मक नतिजाका साथ दुबै लेग खेल्नेछौं ।’ केलिनीले भने, ‘हामी एक टिमसँग दुई खेल खेल्दैछौं । उही टिम हो । तर, व्यक्तिगत प्रदर्शनमा केही फरक पक्का भएको छ ।’