म्याड्रिड (एजेन्सी) – यस सिजन स्पेनिस लालिगामा सोचेअनुरुप प्रदर्शन गर्न नसकेको रियल म्याड्रिड अहिले नयाँ स्ट्राइकरको खोजीमा रहेको बुझ्न सकिन्छ । रियलको आफ्नो प्राथमिकतामा अहिले पोल्यान्ड तथा बायर्न म्युनिखका स्ट्राइकर रोबर्ट लेवान्डोस्की रहेका छन् ।

रियल सिजनको सुरुवातदेखि नै नेयमारसँग जोडिंदै आएको छ । तर विभिन्न श्रोतका अनुसार नेयमार रियल आए अग्रपंक्तिको बायाँमा लेफ्ट विंगरको रुपमा खेल्ने छन् । त्यसैले स्ट्राइकर करिम बेन्जेमाको विकल्पमा अहिले रोबर्ट लेवान्डोस्कीको नाम आएको छ ।

यसअघि रियल टोटनह्यामका स्ट्राइकर ह्यारी केनलाई पनि भित्राउन इच्छुक रहेको थियो । तर केन टोटनह्याममा अझै केही सिजन बस्ने सक्ने देखिएपछि रियल फेरी बजार धाउन बाध्य भएको हो ।

लेवान्डोस्की रियल आउन आफैं पनि इच्छुक रहेका छन् । यही समरमा उनले बायर्नलाई आफ्नो रियलको सरुवा नरोक्न आग्रह गरेका छन् । बायर्नका अध्यक्ष भने लेवान्डोस्की बायर्नमा रहनेमा शतप्रतिशत विश्वस्त रहेका बताएका थिए । यो २९ वर्षीय लेवान्डोस्कीको बजार मुल्य बढाउने उपाय मात्र रहेको टिपणी पनि आएको छ ।

यस समरमा रियलले आफ्नो टोलीमा केही ठूला परिवर्तन गर्ने अपेक्षा गरिएको छ । रियलले आफ्नो प्राथमिकतामा लेवान्डोस्कीसहित नेयमार, केन र चेल्सीका एडेन हाजार्डलाई राखेको बुझिएको छ ।