दिपक बोहोरा
पाँचथर– पाँचथरमा गोल्डकप फुटबल प्रतियोगिताको बाढी नै लागेको छ । पाँच महिनाको फरकमा पाँचथरमा मात्र चार वटा गोल्ड कप आयोजना हुने भएको छ । पुसमा फाल्गुनन्द गोल्डकपको नवौं संस्करण भएको पाँचथरमा यो चैतमा २ वटा गोल्ड कप आयोजना हुँदैछ ।

यो महिना पाँचथर गोल्ड कप र रवि गोल्ड कप आयोजना हुने तयारीमा छ । बैशाखमा त्रिशाली पुजाको अवसर प्रत्येक ३ वर्षमा आयोजना हुने कुम्भायक कुस्सायक गोल्ड कपको दोस्रो संस्करण वैशाख २० गते सुरु हुने भएको छ ।

रानीगुफा सेवा समाज यासोकको आयोजनामा हुने कुम्भायक कुस्सायक नाएन ए साइड फुटबल प्रतियोगितामा ८ टोलीको सहभागिता रहने बताइएको छ । डिभाइन ब्याइज युनियन क्लब काठमाण्डौ , विर्ता युनाइटेड झापा , सुनसरी ११ ,मोरङ ११ ,ताप्लेजुङ जिल्ला फुटबल संघ , भारतको कञ्चनजङ फुटबल क्लब सिलगुडी र आयोजक रानीगुफा सेवा समाजले प्रतियोगितामा भाग लिने छन् ।

पाँचथरको सर्वाधिक पुरस्कार राशि समेत रहेको प्रतियोगिताको विजेताले उपाधि सहित ३ लाख ११ हजार १ सय ११ रुपौयान् र दोस्रो हुने टोलीले १ लाख ५५ हजार ५ सय ५५ रुपैयाँ प्राप्त गर्नेछ । हरेक खेलको म्यान अफ दी म्याचले ५ हजार रुपैयाँ पाउने प्रतियोगिताको सर्वोत्कृष्ट खेलाडीले १० हजार रुपैयाँ प्राप्त गर्नेछन् । प्रतियोगिताको सर्वाधिक गोलकर्ता , उत्कृष्ट रक्षक , उत्कृष्ट गोलकिपर, उत्कृष्ट मिडफिल्ड र उत्कृष्ट फरवार्डले समान ५ हजार रुपैयाँ प्राप्त गर्नेछन् ।