काठमाडौं (हाम्रो खेलकुद) – विवादित भक्तपुर जिल्ला फुटबल संघलाई अखिल नेपाल फुटबल संघ (एन्फ) ले चैत २७ गतेभित्र निर्वाचन गर्न निर्देशन दिएको छ । असन्तुष्ट तीन क्लव भक्तपुर फुटबल संघ, भक्तपुर युनाइटेड क्लब र सिरुटार खेलकुद केन्द्र क्लबले भक्तपुर जिल्ला अदालतमा दायर गरेको मुद्दा मंगलबार फिर्ता लिएपछि भक्तपुर जिल्ला फटुबल संघको निर्वाचन गर्ने बाटो खुलेको हो ।

अब कुनै व्यावधान नआए २७ चैतमा भक्तपुरको निर्वाचन हुनेछ । एन्फाले यसअघि अर्को विवादित जिल्ला मकवानपुरलाई चैत २३ गतेभित्र निर्वाचन गराउन सोमबार नै पत्राचार गरिसकेको छ । विवादमा रहेका दुई जिल्ला फुटबल संघको निर्वाचन भएसँगै एन्फाको केन्द्रिय कार्यसमितिको निर्वाचनको लाग पनि ढोका खुल्नेछ ।

केन्द्रिय निर्वाचन बुधबारको लागि तय थियो । तर भक्तपुर र मकवानपुरको रिटका कारण उच्च अदालत पाटनले निर्वाचन रोक्न अन्तरिम आदेश दिएपछि आजको निर्वाचन एन्फाले स्थगित गरेको थियो । एन्फा प्रवक्ता एवम् सह–महासचिव सञ्जीव मिश्रले मकवानपुर र भक्तपुरको निर्वाचन सम्पन्न भएपछि विश्व फुटबल महासंघ ९फिफा०को अनुमति लिएर तत्कालै केन्द्रीय निर्वाचनको मिति घोषणा गरिने बताए ।

यसअघि मकवानपुर र भक्तपुरका प्रतिनिधिले एन्फाको केन्द्रीय निर्वाचनमा आफ्नो मताधिकार खोसिन लागेको भन्दै गत चैत ७ गते पाटन उच्च अदालतमा मुद्दा दायर गरेका थिए । त्यही मुद्दामा अदालतले अन्तरिम आदेश दिएसँगै एन्फाको बुधबार हुनुपर्ने निर्धारित निर्वाचन अन्योलमा परेको थियो ।