दिपक न्यौपाने

बुटवल – रुस्लान थ्रीस्टार क्लब तेस्रो मदन भण्डारी अन्तराष्ट्रिय गोल्डकप फुटबल प्रतियोगिताको सेमिफाइनलमा पुगेको छ । रामनगरस्थित मानवज्ञान माविको मैदानमा बुधबार हिमालयन एफसी मलेसियालाई २–१ हराउँदै अन्तिम चारमा पुगेको हो ।

खेलको अन्तिम समयमा पुगेर थ्री स्टारले खेल उल्टाएको थियो । अजयी मार्टिन्सले इन्जुरी समयमा गोल गरेपछि थ्री स्टारले अघिल्लो चरणको यात्रा तय गरेको हो । माघको पहिलो साता धनगढीमा स म्पन्न नेपाल आइस सुदूरपश्चिमाञ्चल खप्तड गोल्ड कपमार्फत घरेलु फुटबलमा फर्केको थ्री स्टारले त्यसयता लगातार उच्च प्रदर्शन गर्दै आएको छ ।

थ्री स्टार यो सिजनको सर्वाधिक दोस्रो सफल टोली हो । बुधबार ८५ औं मिनेटमा थ्री स्टारले बराबरी गोल फर्काएको थियो । विदेशी खेलाडी लावलले थ्री स्टारका लागि बराबरी गोल गरेका थिए । त्यसअघि ८३ औं मिनेटमा तीर्थ बस्नेको गोलबाट हिमालयनले अग्रता लिएको थियो । तर, हिमालले अग्रतलाई २ मिनेट पनि टिकाउन सकेन ।

 इन्जुरी समयको पहिलो मिनेटमा मार्टिन्सले गोल गरेपछि थ्री स्टारको जित पक्का भएको हो । मार्टिन्स खेलको म्यान अफ दी म्याच घोषित भए । थ्री स्टारले यो सिजन मदन भण्डारी इटहरी गोल्ड कप, बुढासुब्बा गोल्ड कप र गत महिना तिलोत्तमा गोल्ड कप जितेको थियो । मोफसलको सर्वाधिक पुरस्कार राशीको मदन भण्डारी गोल्डकपको विजेताले १५ र दोस्रो हुने टोलीले ७ लाख ५० हजार रुपैयाँ प्राप्त गर्नेछ ।

मदन भण्डारी गोल्डकपमा बुधबारको अन्तिम क्वार्टरफाइनल
पुलिसविरुद्ध मनाङ