जुरिच (एजेन्सी) – गए राति अन्तर्राष्ट्रिय मैत्रीपूर्ण खेल अन्तर्गत स्पेनले अर्जेन्टिनालाई ६-१ को स्कोरले स्तब्ध बनाएको छ । स्पेनका लागि इस्कोले ह्याट्रिक गरेका थिए ।

स्पेनले पहिलो हाफमा २-१ को अग्रता लिएको थियो भने दोस्रो हाफमा ४ गोल थप्दै अर्जेन्टिनालाई स्तब्ध बनायो । स्पेनका लागि इस्कोले ३ गोल गरेका थिए भने डिएगो कोस्टा, इआगो आस्पास र थियागोले एकएक गोल गरे । अर्जेन्टिनाका लागि डिफेन्डर निकोलास ओटामेन्डिले एक गोल गरेका थिए । यस खेलमा अर्जेन्टिनाका स्टार लियोनल मेस्सी पूर्ण फिट नभएकाले मैदानमा सामेल थिएनन् ।

त्यस्तै ग्याब्रियल जेससको गोलमा ब्राजिलले जर्मनीलाई १-० ले हराउन सफल रह्यो । पहिलो हाफमा म्यानचेस्टर सिटीका स्ट्राइकर जेससले गरेको गोलमार्फत जर्मनीले युरो २०१६ पछि आफ्नो पहिलो हार बेहोर्‍यो ।

यसैगरी इंग्ल्यान्ड र इटाली १-१ गोलमा रोकिए । इंग्ल्यान्डलाई पहिलो हाफमा जेमि भार्डीले अग्रता दिलाएका थिए तर खेलको अन्तिमतिर लोरेन्जो इन्सिन्याले गोल गर्दै टोलीलाई बराबरी दिलाए ।

त्यस्तै किलियन बाप्पेको दुई गोल र पल पोग्बाको सुन्दर फ्रिकिकमार्फत फ्रान्सले रुसलाई ३-१ ले हरायो । त्यस्तै अन्य खेलमा बेल्जियमले साउदी अरेबियालाई ४-० ले हरायो । बेल्जियमका लागि रोमेलु लुकाकुले दुई गोल गरे । केभिन डे ब्रुयनले एक तथा मिची ब्याटसुवायीले पनि एक गोल गरे ।