काठमाडौं (हाम्रो खेलकुद) – एसियन कप छनोट फुटबलमा नेपालले आज आफ्नो अन्तिम खेलमा यमनको सामना गर्दैछ । समूह एफअन्तर्गतको खेल कतार स्पोट्र्स क्लब सुहेन बिन हमाद रगंशालामा हुनेछ । दुई दिनअघि कतार पुगेको नेपालले त्यहि मैदानमा अभ्यास गरेको थियो ।

एसिया कप छनोटको होडबाट बाहिरिसकेको नेपालको लागि यस खेल प्रतिष्ठाको लागि मात्रै हुनेछ । यमनविरुद्धको खेलमा यो सिजन मैदानमा खासै जम्न नसकेका विमल घर्ती मगर र नवयुग श्रेष्ठले फरवार्डलाइन सम्हाल्ने सम्भावना छ । यमनविरुद्धको सम्भाविता ११ मा घरले फुटबलमा उच्च प्रदर्शन गरिरहेका सुनिल बलले मौका पाउने सम्भावना छ ।

मिडफिल्डमा सुनिलसँगै विशाल राई, रोहित चन्द र अन्जन विष्ट खेल्नेछन् । त्यस्तो कप्तान विराज महर्जनसहित आदित्य चौधरी, अनन्त तामाङ र दीनेश राजवंशीले रक्षापक्ति सम्हाल्नेछन् । नेपालका नम्बर एक गोलकिपर किरण चेम्जोङको पहिलो रोजाइमा यथावत छन् ।

नेपालका लागि भन्दा एसिया कप छनोटको दाबेदारी प्रस्तुत गरिरहेको यमनका लागि यो खेल महत्वपूर्ण छ । नेपाललाई हराएमा यमन एसिया कपमा छनोट हुनेछ । समूहमा फिलिपिन्स र ताजकिस्तान छन् । समूह चरणबाट शीर्ष दुई स्थानमा रहने टोलीले अर्को वर्ष युएईमा हुने एएफसी एसियन कपमा सहभागिता जनाउनेछन् ।

नेपाली टोलीको सम्भावित ११ – किरण चेम्जोङ (गोलकिपर), विराज महर्जन (कप्तान), दीनेश राजवंशी, आदित्य चौधरी, अनन्त तामाङ, रोहित चन्द, विशाल राई, अन्जन विष्ट, सुनिल बल, नवयुग श्रेष्ठ, विमल घर्तीमगर