लण्डन (एजेन्सी) –म्यानचेस्टर सिटी तथा अर्जेन्टिनाका फुटबल स्टार सर्जियो अगुएरोले आफु लियोनल मेस्सीको छायाँमा नपरेको बताएका छन् । प्रिमियर लिगमा चर्चामा रहेका अगुएरोले राष्ट्रिय टोलीबाट खेल्दा मेस्सीको छायाँमा परेको महसुस कहिल्यै नगरेको बताएका छन् ।

इटालीसँग शुक्रबारको मैत्रीपूर्ण खेलमा भने मेस्सी र अगुएरो चोटका कारण सामेल भएनन् । यद्दपी खेल अर्जेन्टिनाले इटालीलाई २–० ले हराएको थियो । अगुएरोले मेस्सीसँग खेल्दा छायाँमा पर्ने भन्दा पनि धेरै सिक्न पाइने बताएका छन् । उनले मेस्सी विना राष्ट्रिय टोलीको प्रदर्शनमा फरक पर्ने पनि बताएका छन् ।

मेस्सी विनाको नाइजेरियासँगको मैत्रीपूर्ण खेल गुमाएको स्मरण गर्दै उनले भने, ‘मेस्सी अर्जेन्टिनाको एक होनाहर खेलाडी हुन् । उनीबाट सबैले सिक्न सकिन्छ ।” नाइजेरियाविरुद्ध पहिलो हाफमा गोल गरेका अगुएरो मध्यान्तरमा बेहोस भएका थिए । पहिलो हाफमा २–१ ले अग्रता लिएको उक्त खेलमा अर्जेन्टिना अन्तमा ४–२ ले पराजित भएको थियो ।

अगुएरोले भने, “अर्जेन्टिनाले डिएगो म्याराडोना, ग्राभिएल बाटिस्टुटा, लिओनल मेस्सी, स्टेफानो फुटबल इतिहासमा नाम लेखाउने स्टारहरुलाई जन्माएको छ । उनीहरुको छायाँमा न कोही खेलाडी परेका थिए, न म मेस्सीको छायाँमा परेको छु । त्यो सबै बाहिरी दृष्टिकोण मात्रै हो । ’