बार्सिलोना (एजेन्सी)– फुटबलका दुई सुपर स्टार बार्सिलोनाका लियोन मेस्सी र रियल म्याड्रिडका क्रिस्टियानो रोनाल्डोबीच प्रतिस्पर्धा हुनुलाई ब्राजिलियन पूर्व स्टार रोनाल्डिन्होेले उत्तम भएको बताएका छन् । दशक यता मेस्सी र रोनाल्डोले विश्व फुटबललाई चम्किलो बनाएको रोनाल्डिन्होको भनाई छ ।

‘मेस्सी र रोनाल्डोले १० पटक बालोन डी’ ओर जितेका छन् । दुवैले गोलको वर्षा गरिरहेका छन्,’ बार्सिलोनाका पूर्व स्टार उनले भने,‘उनीहरुले कयौं उपाधि जितेका छन् । कति कीर्तिमान बनाउका छन् । उनीहरुबीचको प्रतिस्पर्धाले फुटबललाई थप रोमाञ्चक बनाएको छ ।’

एउटै पुस्ताका रोनाल्डो र मेस्सीमा को उत्कृष्ट भन्ने वहस चलिरहेको छ । उनले भने ‘ दुवै सुपर स्टार हुन् । उनीहरुका कारण फुटबललाई नै राम्रो भएको छ । दुई खेलाडीबीच बालोन डी’ ओरका लागि सधै प्रतिस्पर्धा हुने गर्दछ । जुन खेलाडीले पनि आफुलाई उत्कृष्ट गर्न प्रयास गर्छन् ।’

अर्जेन्टिनाका मेस्सी र पोर्चुगलका रोनाल्डोले क्लब फुटबलका लागि सबै खाले उपाधि जितेपनि अहिले सम्म दुवैले विश्व कप भने जित्न सकेका छैनन् । सन् २००२ को विश्व कप विजेता ब्राजिलका सदस्य रोनाल्डिन्होले रसियामा हुने विश्वकपमा अर्जेन्टिनालाई दाबेदार मध्येको एक भएको बताए । सँगै उनले विश्व कपमा ब्राजिल मुख्य चुनौति हुने बताएका छन् ।