दिपक न्यौपाने

बुटवल – तेस्रो मदन भण्डारी अन्तर्राष्ट्रिय नकआउट फुटबल प्रतियोगिताको उद्घाटन खेलमा सुदुर पश्चिम–११ लाई हराउँदै आयोजक मदन भण्डारी स्पोर्ट्स एकेडेमी काठमाण्डौं क्वाटरफाइनलमा प्रवेश गरेको छ ।

मदन भण्डारी स्पोर्टस एकेडेमी प्रदेश नम्बर ५ को आयोजनामा शुक्रबार बुटवलको रामनगरस्थित मानव ज्ञान माध्यमिक विद्यालयको खेल मैदानमा भएको प्रतिस्पर्धामा सुदुरपश्चिममाथि आयोजकले ५-१ को सहज जित हासिल गरेको हो । खेलको सुरुवाती समयदेखि नै प्राप्त अवसरहरुलाई सदुपयोग गर्न सकेको थिएन र १-१ को बराबरीमा रोकिन बाध्य भएको थियो । तर दोस्रो हाफमा गोलको वर्षासंगै सुदुर पश्चिम–११ लाई पाखा लगाउन सफल रह्यो ।

खेलको १८ औं मिनेटमा आयोजकका प्रकाश बुढाथोकीले आबाको पासलाई सदुपयोग गर्दै गोल गरेर टोलीलाई अग्रता दिलाएका थिए । १ गोलले पछाडी परेको सुदुर पश्चिम दबाबका बीच ४४ औं मिनेटमा पूर्णअन्जान ध्वजुले गोल गरेर खेललाई बराबरी पुर्‍याएका थिए । दोस्रो हाफमा आयोजक टिमले अधिकांश समय बललाई आफ्नो नियन्त्रणमा लिएका थिए जसका कारण आयोजक थप ४ गोल गरी फराकिलो अन्तर सहित क्वाटरफाइनलको यात्रा सुनिश्चित गर्न सफल रह्यो ।

खेलको ६४ औं मिनेटमा आयोजक टिमका प्रकाश बुढाथोकीले बललाई अगाडी बढाएर गरेको प्रहार पोष्टमा लाग्दै गोलमा परिणत भएको थियो । त्यस्तै ७१ औं मिनेटमा विदेशी खेलाडी आबाले गोल गरे भने ७७ औं मिनेटमा विश्व अधिकारीले प्रहार गरेको फ्रि किकले सिधै जाली चुमेको थियो । खेलको अन्त्य हुन १ मिनेट अगाडी दिपेश आलेको लामो दुरीको प्रहार पनि सिधै गोलमा परिणत भएको थियो ।

पहिलो हाफमा समान गोलका साथ बराबरीमा रहेको सुदुर पश्चिम दोस्रो हाफमा दवाबका बिच कुनै गोल गर्न सकेन । जितसंगै आयोजक मदन भण्डारी स्पोर्ट्स एकेडेमीका दुई गोल गरेका प्रकाश बुढाथोकी ‘म्यान अफ द म्याच’ हुँदै नगद १० हजार रुपैंया पुरस्कार प्राप्त गरेका छन् । प्रतियोगितामा दोस्रो खेल आइतबार हुने छ । उक्त खेलमा सशत्र प्रहरीको एपिएफ र झापा–११ भिड्ने आयोजकका धुव्र आर्चायले जानकारी गराए ।

मोफसलको सर्वाधिक पुरस्कार राशी रहेको प्रतियोगिताको एक समारोहका बीच राष्ट्रपति विद्यादेवी भण्डारीले उद्घाटन गर्नुभएको हो । राष्ट्रपति भण्डारीले खेलाडीलाई बल हस्तान्तरण गरेर खेलको उद्घाटन गर्नुभयो । सवा करोडको लागतमा हुने गोल्डकपमा ‘ए’ डिभिजन क्लबहरु सहित दश टिमको सहभागिता रहेको छ । प्रतियोगितामा मलेसियाको हिमालय फुटबल क्लबले समेत सहभागिता जनाएको छ । यही चैत्र १९ गतेसम्म चल्ने प्रतियोगिताको विजेताले १५ लाख र उपविजेताले ७ लाख ५० हजार नगद पुरस्कार पाउनेछन् ।