डुसेलडर्फ (एजेन्सी) – विश्वकप छनोटको तयारीमा रहेका विश्व फुटबलका दुई महारथी, जर्मनी र स्पेन जर्मनीको डुसेलडर्फमा मैत्रीपूर्ण खेलमा भेट्दै छन्। सन् १९३५ यता जर्मनीको घरेलु मैदानमा स्पेन पहिलो जित दर्ता गर्ने प्रयासमा रहनेछ।

स्पेन र जर्मनीको २०१४ पछिको यो पहिलो भेट हो। सन् २०१४ को नभेम्बरमा भएको अन्तर्राष्ट्रिय मैत्रीपूर्ण खेलमा स्पेन आफ्नो घरेलु मैदानमा १-० ले पराजित भएको थियो। टोनी क्रुसले ८९ औं मिनेटमा खेलको एकमात्र गोल गर्दै घरेलु समर्थकहरुलाई स्तब्ध बनाएका थिए।

सन् २०१० मा पहिलो पटक विश्वकपको उपाधि जित्ने क्रममा स्पेनले जर्मनीलाई सेमिफाइनलमा पराजित गरेको थियो। जर्मनी भने ४ पटकको विश्वकप विजता हो।

जर्मनीका नम्बर १ गोल किपर म्यानुयल नोया चोटका कारण उपलब्ध नहुँदा बार्सिलोनाका टर स्टेगनले पोस्ट सम्हाल्ने छन्। त्यस्तै बोरुसिया डर्टमन्डका मारियो गोत्जेपनि चोटका कारण खेल्ने छैनन्।

स्पेनका प्रशिक्षक जुलेन लोपटेग्युले भने चेल्सीका ‘आउट अफ फर्म’ स्ट्राइकर अल्भारो मोरटालाई टोलीमा समावेश गरेका छैनन्। चेल्सीका पूर्व स्ट्राइकर डिएगो कोस्टाले उनको स्थान लिएका छन्।

हेड टू हेड :

अहिलेसम्म स्पेन र जर्मनीको २२ भेटमा जर्मनीले ९ खेलमा जित हात पारेको छ भने ७ मा पराजय भोगेको छ। विश्व कपमा ४ पटकको भेटमा स्पेनले १ मा मात्र जित हात पारेको छ भने १ खेल बराबरी तथा जर्मनीको नाममा २ जित छ।

खेल हुने नेपाली समय : रातको १:३० बजे