म्याड्रिड (एजेन्सी)– लगातार तीन पटक पोर्चुगल वर्ष खेलाडीको अवार्ड जितेका रियल म्याड्रिडका स्टार क्रिस्टियानो रोनाल्डोले रियलमा रहन एक सर्त अगाडि राखेको जानकारी आएको छ ।

गएको सिजनमा क्लबलाई १२ औँ च्याम्पियन्स लिग उपाधि दिलाएका रोनाल्डोले क्लब छाड्न चाहेको समाचार पटक पटक मिडियामा आइराखेको छ । कर छली प्रकरणमा मुछिएपछि रुष्ट बनेका रोनाल्डोले स्पेन नफर्कने ‘मुड’ बनाएको खबरमा बताइएको थियो । रोनाल्डो आफैले भने यस विषयमा केही तर्क दिएका थिएनन् । तर, विभिन्न अन्तर्राष्ट्रिय खबरका अनुसार रोनाल्डोले क्लबमा रहन रियल म्याड्रिड सामु एक सर्त राखेका छन् ।

डेली मिररका अनुसार रोनाल्डोले क्लबसामु आफूले तिर्न बाँकी रहेको भनिएको १४.७ मिलियन युरो क्बलले तिर्न माग गरेका छन् । यता, प्रशिक्षक जिनेदिन जिदानले रोनाल्डोलाई फोन गरेर रियलमा नै रहन आग्रह गरेका बताइएको छ । त्यस्तै कप्तान सर्जियो रामोसले पनि रोनाल्डोलाई क्लबमा नै रहन सुझाव दिएका बुझिएको छ ।

उता, रियल छाड्ने चर्चा भएपछि विभिन्न क्लबहरुले रोनाल्डोलाई भित्र्याउने तयारी गरेका छन् । मिडिया रिपोर्टका अनुसार पेरिस सेन्ट जर्मेन (पिएसजी) रियलका स्टार फरवार्डलाई भित्र्याउन १ सय ४० मिलियन युरो तिर्न तयार रहेको छ । क्लबले रोनाल्डोको एजेन्ट जर्ज मेन्डेससँगको कुराकानीमा रोनाल्डोले माग गर्ने वार्षिक ३० मिलियन युरो तलब पनि तिर्न तयार रहेको बताएको छ ।

उता म्यानचेस्टर सिटी र म्यानचेस्टर युनाइटेडले पनि उनलाई भित्राउने प्रयासमा रहेको बताइएको छ । हालै रोनाल्डोले ‘२०१७ पोर्चुगल वर्ष खेलाडी’ को उपाधि जितेका छन् । ३३ वर्षे पोर्चुगेली फरवार्ड रोनाल्डोको यो लगातार तेस्रो उपाधि हो ।