बुटवल  (हाम्रो खेलकुद) – मोफसलकै सर्वाधिक पुरस्कार राशीको मदन भण्डारी अन्तर्रा्ष्ट्रिय गोल्ड कप फुटबल प्रतियोगिता आज सुरु हुँदैछ । तेस्रो संस्करणको गोल्ड कपको उद्घाटन राष्ट्रपति विद्यादेवी भण्डारीले गर्ने कार्यक्रम छ । उद्घाटन खेल आयोजक मदन भण्डारी स्पोर्टस् एकेडेमी र सुदूरपश्चिम ११ बीच हुने बताइएइको छ ।

प्रतियोगितामा नेपालका तीन विभागिय सहित अन्य ए डिभिजन र अन्य क्लबको सहभागिता रहेको छ । त्रिभुवन आर्मी क्लब, नेपाल पुलिस क्लब, एपिएफ, रुस्लान थ्री स्टार, लक्ष्मी हुन्डाई हुन्डाई मनाङ मस्याङ्दीसहित १० टोलीले प्रतियोगितामा प्रतिस्पर्धा गर्दैछ । मलेसियाबाट हिमालयन फुटबल क्लबले पनि प्रतियोगितामा सहभागिता जनाएको छ ।

गोल्ड कपको विजेताले १५ लाख रुपैयाँ र दोस्रो हुने टोलीले ७ लाख ५० हजार रुपैयाँ प्राप्त गर्नेछ । मोसफलमा सर्वाधिक पुरस्कार राशी राखेर गोल्ड कप फुटबल प्रतियोगिता आयोजनाको होड चलेको छ । माघमा सर्वाधिक पुरस्कार राशी नेपाल आइस खप्तड गोल्डकपको विजेताले ११ लाख ११ हजार १ सय ११ रुपैयाँ, त्यसपछि मदन भण्डारी इटहरी गोल्ड कपमा १२ लाख र गत महिना झापा गोल्ड कपको विजेताले १२ लाख ५१ हजार रुपैयाँ पुरस्कार जितेको थियो ।

खप्तड र झापा गोल्ड कप आर्मी र इटहरी गोल्डकप थ्री स्टारले जितेको थियो । आयोजक मदन भण्डारी स्पोट्र्स एकेडेमी पाँच नम्बर प्रदेश कमिटिका अनुसार खेल दिउँसो २ बजेपछि बुटबलको रामनगरमा रहेको मानव ज्ञान माध्यमिक विद्यालयको खेल मैदानमा हुनेछ ।