पेरिस (एजेन्सी) – पछिल्लो विश्वकपयता नेयमारको हेयर स्टाइलले  निकै चर्चा पाएको छ । उनले हरेक सिजनमा नयाँ प्रकारको हियर स्टायल अप्नाउने गर्दछन् । उनले आफ्नो हेयर स्टाइल आफ्नो लागि नभई आफ्ना प्रशंसकहरुका लागि परिवर्तन गर्ने बताए ।

यस सिजन नेयमार बार्सिलोनाबाट २ सय २२ मिलियन युरोको कीर्तिमानी रकममा पेरिस सेन्ट जर्मन (पिएसजी) पुगेका थिए । पिएसजी तथा ब्राजिलका स्टार खेलाडी नेयमार यो सिजन निकै उत्कृष्ट लयमा थिए । पछिल्लो समय चोटका कारण मैदान बाहिर रहेका नेयमारले हालै मात्र हेयर स्टाइल परिवर्तन गरेका छन् ।

उनको हालको हेयर स्टाइल पहिले भन्दा निकै फरक छ, जसलाई ‘डेड लक’ पनि भनिन्छ । उनले यस्तो प्रकारको हेयर स्टाइल पहिलो पटक बनाएको जनाएका छन् । ‘यूके च्यानल’का अनुसार उनले यस्तो प्रकारको हेयर स्टाइल प्रशंसकहरुको आग्रहमा बनाएको जानकारी दिएका छन् ।

नेयमारको जस्तै ब्राजिलमा पुरुषहरुले पनि फेसनको रुपमा आफ्नो हेयर स्टाइल उनीजस्तै परिर्वतन गर्ने बुझिएको छ । नेयमारले आफ्ना प्रशंसकहरुका लागि आगामी सिजनको सुरुवातमा पनि हेयर स्टाइल परिवर्तन गर्ने सार्वजनिक गरेका छन् ।

बार्सिलोनामा लियोनल मेस्सीको छायाँमा परेको महसुस गरेको भन्दै व्यक्तिगत उपाधि जित्न नेयमार यस सिजन पिएसजी आएका थिए । यस सिजनको सुरुवातदेखि लयमै रहेका नेयमार घाइते भएसँगै पिएसजी रियलसँग हार्दै च्याम्पियन्स लिग को अन्तिम १६ बाट पनि बाहिरियो ।

आफ्नो पहिलो सिजन नबित्दै नेयमार अर्को सिजन रियल म्याड्रिड जाने खबर व्याप्त रहेको छ । नेयमार आफैं पनि रियलसँग जोडिन चाहेको बुझिएको छ । त्यसैले उनले पिएसजीसँग १ मिलियन (१० लाख) पाउण्डको तलब माग गरेका हालै चर्चामा आएको छ । अहिले नेयमारले हप्तामा ६ लाख युरो बुझिरहेका छन् ।