म्याड्रिड (एजेन्सी)– अर्को सिजन सुरु हुन यता नै विभिन्न फुटबल खेलाडीहरुको सरुवाको चर्चा चल्न सुरु भइसकेको छ । जसमध्ये इंग्ल्यान्ड तथा टोटनह्यामका स्ट्राइकर ह्यारी केन निकै चर्चाको विषय बनेका छन् । सिजनको शुरुवात देखि निकै चर्चामा आएका केन टोटनह्यम हटस्परका स्टाइकर हुन् ।

उनले अघिल्लो सिजनमा बार्सिलोनाका स्टार लियोनल मेस्सीलाई पछाडि पार्दै सिजनकै सबैभन्दा बढि गोल गर्ने खेलाडीको रुपमा आफ्नो स्थान बनाउन सफल भएका थिए । पुरै सिजनमा लियोनल मेस्सीले ५४ गोल गरे भने मेस्सीलाई पछि पार्दै केनले ५७ गोल गरेका थिए । मेस्सीलाई उछिनेयता केनको निकै चर्चा भएको थियो । केनले यस सिजनमा प्रिमियर लिगमा घाइले नहुँदासम्म सिजनमा धेरै गोल गर्ने खेलाडिको रुपमा आफुलाई स्थापित गरेका थिए ।

केनले सिजनको शुरुवातदेखि हालसम्म लिगमा २४ गोल गरेका छन् । तर, अहिले केनलाई उछिन्दै लिभरपुलका फरवार्ड मोहमद सालाहले २८ गोल गरिसकेका छन् । केनको यहि उत्कृष्ट प्रदर्शनलाई लिएर रियल म्याड्रिड र पिएसजीजस्ता ठुला क्लबहरु उनलाई भित्राउने होडबाजीमा छन् । युरोपियन मिडियाहरुका अनुसार केनको रुचि भने रियलमा रहेको बताइएको छ । प्रशिक्षक मौरिसियो पोचेटिनोले भने केन टोटनह्यममै रहने विश्वास व्यक्त गरे । तर, यस बारेमा केनले भने केहि तर्क दिएका छैनन् ।

बोर्नमथ विरुद्धको खेलमा खुट्टाको जोर्नीमा चोटका कारण उनलाई ३० औं मिनेटमा मैदानबाट बाहिर निकालिएको थियो । बोर्नमथका गोलकिपर अस्मिर बेगोभिचसँग भिड्दा केन घाइते हुन पुगेका थिए । टोटनह्याम र इंग्ल्यान्डका महत्त्वपूर्ण सदस्य रहेका केनले यस सिजन सबै प्रतियोगितामा युरोपमा ३५ गोल गरेका छन् ।