न्यूयोर्क (एजेन्सी)– बार्सिलोनाका सुपरस्टार अर्जेन्टिनी लियोन मेस्सी असाधारण खेलाडी भएपनि पेले र म्यारोडोनाको स्तरमा पुग्न अझै बाँकी रहेको चेल्सीका महान पूर्व खेलाडी डिडिएर ड्रोग्बाले बताएका छन् ।

मेस्सीलाई उनको पुस्ताको विश्वकै उत्कृष्ट खेलाडीका रुपमा हेरिदा ड्रोग्बाको यस्तो भनाई सार्वजनिक भएको छ । यद्दपी ड्रोग्बाले मेस्सीमा महान खेलाडीको सुचिमा पुग्ने क्षमता भने रहेको बताएका छन् ।

ब्राजिलियन पेले र अर्जेन्टिनी म्यारोडोना आफ्नो पुस्ताका महान खेलाडी हुन् । दुवैले आफ्नो देशका लागि विश्व कप जितेका थिए । यद्दपी मेस्सीले भने त्यो सफलता प्राप्त गरेका छैनन् । ड्रोग्बाले मेस्सीको जादु यो वर्ष रसियामा हुने विश्व कपमा देख्न सकिने विश्वास व्यक्त गरेका छन् ।

‘उनले फुटबलमा धेरै गरेका छन्,’ आइभरी कोस्टका पूर्व कप्तान ड्रोग्बाले भने,‘ यद्दपी उनी म्यारोडोना र पेले जस्तो भएका छैनन् । यद्दपी त्यो भन्दा धेरै टाढा पनि छैनन् । विश्व कप जित्न सके उनी उनीहरु भन्दा पनि महान बन्न सक्छन् । उनी त्यस्ता हुन् जो साधारण खेलाडी भन्दा फरक छन् ।

३० वर्षे मेस्सीका यो विश्व कप जित्दै महान खेलाडीको सुचिमा पर्न चाहन्छन् । सम्भवत जुनमा सुरु हुने यो विश्वकप खेलाडीका रुपमा मेस्सीको अन्तिम हुन सक्दछ । बार्सिलोनाबाट भने मेस्सी सबै खाले अन्तर्राष्ट्रिय क्लब प्रतियोगिताको उपाधि जितिसकेका छन् ।

अर्जेन्टिना लगातार तीन पटक ठूला प्रतियोगिताको फाइनल हारेको छ । सन् २०१५ र २०१६ को कोपा अमेरिकाको फाइनलमा चिलीसँग पराजित भएको अर्जेन्टिनाले २०१४ को विश्व कपको फाइनमा जर्मनीसँग हारेको थियो ।