पशुपतिको ‘ए’ टिमले प्रथम साइपाल कप अन्तरविद्यालय यु–१६ छात्र सिक्स ए साइड फुटबल प्रतियोगिताको उपाधि शनिबार जितेको छ ।

चावहिलको गणेशस्थानमा भएको फाइनलमा पशुपतिले काभ्या ‘ए’ लाई २–० गोलले पराजित गर्‍यो । पहिलो हाफ गोलरहित बराबरीमा टुंगिएको थियो । दुवै गोल दोश्रो हाफमा पशुपतिका सौरव खत्रीले गरे । सौरवले गरेको दुवै गोल उत्कृष्ट थियो । सौरभ नै प्रतियोगिताको उत्कृष्ट खेलाडी पनि चुनिए ।

साइपाल एकेडेमीद्वारा आयोजित प्रतियोगितामा पशुपति ‘ए’ का विकास राई गोलरक्षक, पशुपति ‘ए’ कै विक्रम कुमार डिफेन्स तथा काभ्या ‘ए’ का दिपेन्द्र केसी मिडफिल्डमा उत्कृष्ट घोषित भए । अनुशासित टिमको उपाधि आई लेन्स ‘बी’ ले हात पार्‍यो ।

विजेतालाई साइपालका कार्यकारी निर्देशक गणेश भण्डारी, साइपालका प्रिन्सिपल सुमन नगरकोटी, गंगाहिटी टोल सुधार समितिका अध्यक्ष कृष्णमणि भट्टराईलगायतले एक कार्यक्रमबीच पुरस्कृत गरे ।

सोही अवसरमा साइपालमा प्लस टु अध्ययनका लागि चार खेलाडीलाई पूर्ण छात्रवृत्ति दिने घोषणा गरिएको छ । छात्रवृत्ति पाउनेमा डेनेब एकेडेमीका सागर कट्वाल तथा पशुपति ‘ए’ का त्रय लक्ष्य मगर, विक्रम कुमार र विकास राई रहेका छन् ।

आठदिने प्रतियोगितामा विभिन्न विद्यालयका ३२ टिमले नकआउट आधारमा प्रतिस्पर्धा गरेको साइपालका प्रशिक्षक विनोद क्षेत्रीले जनाएका छन् ।