काठमाडौं (हाम्रो खेलकुद) – एएफसी एसियन कप छनोटको समूह ‘एफ’ अन्तर्गत अन्तिम खेलमा नेपाल यमन विरुद्ध खेल्दै छ । छनोट हुने सम्भावना सकिएकोले यस खेल नेपालका लागि प्रतिष्ठाका लागि हुनेछ ।

समय: नेपाली समयअनुसार रातिको ९ बजे, २७ मार्च
स्थान: सुहिम बिन हमाद स्टेडियम, दोहा, कतार

नेपाल समूहमा आफ्नो पहिलो जितको पर्खाइमा रहेको छ । अर्को तर्फ नेपाललाई पराजित गर्दै यमन एएफसी एसियन कपमा आफ्नो स्थान सुनिश्चित गर्न चाहन्छ । नेपाली राष्ट्रिय टोलीका प्रशिक्षक ग्योतोकु कोजीले हिजो २० सदस्यीय नेपाली टिमको घोषणा गरेका थिए :

गोलरक्षक : किरण चेम्जोङ, विकेश कुथु र एलन न्यौपाने

डिफेन्डर : विराज महर्जन (कप्तान), अनन्त तामाङ, आदित्य चौधरी, दिनेश राजवंशी, रञ्जित धिमाल र देवेन्द्र तामाङ

मिडफिल्डर : रोहित चन्द, विशाल राई, हेमन गुरुङ, हेमन्त थापामगर, सुनील बल, सुमन लामा र सुजल श्रेष्ठ

फरवार्ड : विमल घर्तीमगर, नवयुग श्रेष्ठ, जर्जप्रिन्स कार्की र अञ्जन विष्ट

सुरुवाती ११ मा गोलकिपरमा किरणले नै निरन्तरता पाउने लगभग पक्का रहेको छ । त्यस्तै अनन्त तामाङ र आदित्य चौधरीले सेन्ट्रल डिफेन्सको जिम्मेवारी सम्हाने देखिन्छ । कप्तान विराज महर्जन र पुलिसका युवा खेलाडी दिनेश राजवंशी डिफेन्सको बायाँ र दायाँतिर खेल्ने सम्भावना रहेको छ ।

पर्सिजा जाकार्तामा आबद्ध रोहित चन्दले डिफेन्सिभ मिडफिल्डरको भुमिका निर्वाह गर्ने छन् भने मिडफिल्डमा उनलाई मनाङका अनुभवी खेलाडी विशाल राईले साथ दिने छन् । विङमा अन्जन विष्ट र सुजल श्रेष्ठको स्थान पक्का जस्तै देखिएको छ भने फरवार्ड लाइन विमल घर्ती मगर र नवयुग श्रेष्ठले सम्हाल्ने देखिन्छ ।

नेपालको समूह ‘एफ’मा नतिजाहरु यस प्रकारको रहेको छ:

फिलिपिन्स ४-१ नेपाल
नेपाल ०-० यमन
नेपाल १-२ ताजिकिस्तान
नेपाल ०-० फिलिपिन्स
ताजिकिस्तान ३-० नेपाल

समूह ‘एफ’ को अंक तालिका

टोली	खेल	जित	बराबरी	हार	गोलअन्तर	अंक
फिलिपिन्स	५	२	३	०	+४	९
यमन	५	१	४	०	+१	७
ताजिकिस्तान	५	२	१	२	+२	७
नेपाल	५	०	२	३	-७	२