पेरिस (एजेन्सी) – पेरिस सेन्ट जर्मन (पिएसजी) तथा ब्राजिलका स्टार खेलाडी नेयमारले क्लबसँग साप्ताहिक १ मिलियन पाउन्ड तलब माग गरेका छन् । सो तलब पिएसजीले दिन सके मात्र नेयमार त्यहिं बस्ने द टाइम्स पत्रिकाले जनाएको छ ।

नेयमार यसै सिजन बार्सिलोनाबाट २ सय २२ मिलियन युरोको कीर्तिमानी रकममा पिएसजी पुगेका हुन् । आफ्नो पहिलो सिजन नबित्दै नेयमार अर्को सिजन रियल म्याड्रिड जाने खबर व्याप्त रहेको छ ।

नेयमार आफै पनि रियलसँग जोडिन चाहेको बुझिएको छ । त्यसैले उनले पिएसजीसँग १ मिलियन (१० लाख) पाउण्डको तलब माग गरेका छन् । अहिले नेयमारले हप्तामा ६ लाख युरो बुझिरहेका छन् र उनी विश्व फ़ुटबलमै धेरै तलब बुझ्ने खेलाडीमा पर्छन् । यस्तोमा उनलाई १ मिलियन दिनु पिएसजी जस्तो आर्थिक रुपमा बलियो  क्लबलाई पनि निकै गाह्रो पर्ने छ ।

बार्सिलोनामा लियोनल मेस्सीको छायाँमा परेको महसुस गरेको भन्दै व्यक्तिगत उपाधि जित्न नेयमार यस सिजन पिएसजी आएका थिए । तर लयमै  रहेका नेयमार घाइते भएसँगै पिएसजी रियलसँग हार्दै च्याम्पियन्स लिगबाट पनि बाहिरियो ।

यस सिजन नेयमार सिधै विश्वकपमा फर्किने देखिएको छ । विश्वकपपछि भने नेयमार कुन जर्सीमा देखा पर्ने हुन् त्यो अन्योलमा छ । उनको १ मिलियनको तलब मागले त्यसमा थप अनिश्चितता थपिएको छ ।