दिपक बोहोरा

पाँचथर– मोफसलका नकआउट फुटबल प्रतियोगिताका कतिपय आयोजक संस्थाले आयव्यय सार्वजनिक गर्ने गरेका छन् । केहि आयोजकले पत्रकार सम्मेलनमार्फत प्रतियोगिताको हिसाब सार्वजनिक गरेका छन् । तिलोत्तमा गोल्डकप नकआउट फुटबल प्रतियोगिताको आयोजक रुपन्देही जिल्ला फुटबल संघले शनिबार समापनका क्रममा नै हिसाब सार्वजनिक गरेको थियो ।

तर, पाँचथर जिल्लामा भने आयव्यय सार्वजनिक गर्ने परम्परा छैन । दोस्रो पाँचथर गोल्ड कप फुटबल प्रतियोगिता आयोजना सुरु हुन केहि दिन बाँकी रहँदा पनि पहिलो संस्करणको हिसाब सार्वजनिक भएको छैन । दोस्रो पाँचथर गोल्ड कप चैत २५ गतेबाट सुरु हुने बताइएको छ ।

त्यस्तै पाँचथरको अर्को प्रतिष्ठित फाल्गुनन्द गोल्ड कप फुटबल प्रतियोगिताको नवौं संस्करण सम्पन्न भइसक्दा पनि आयोजक फिदिम स्पोर्टिङ क्लबले हिसाब सार्वजनकि गर्न सकेको छैन । सार्वजनिक सरोकारको विषयमा सबैलाई जानकारी दिनुपर्दछ । पाँचथरमा हुने यी दुई ठूला प्रतियोगितामा राज्य, समुदाय र विभिन्न संघ संस्थाले सहयोग गर्दै आएका छन् ।

पारदर्शिताको नियम अनुसार यी प्रतियोगिताका आयोजकले हिसाब सार्वजनिक गर्नुपर्ने पत्रकार मंगल बेघालेले बताए । पाँचथर गोल्डकपको आयोजक पाँचथर क्लबका अध्यक्ष अनुराग मगरले प्रतियोगिताको पहिलो संस्करणमा घाटा परेकोले हिसाब सार्वजनिक गर्न नसकेको बताएका छन् । फिदिम स्पोर्टिङ क्लबका अध्यक्ष विमल श्रेष्ठले प्रयोजकहरुले वाचा गरे अनुसारको रकम नदिएका कारण समयमा हिसाब सार्वजनिक गर्न नसकेको बताए ।