काठमाडौं (हाम्रो खेलकुद) – अखिल नेपाल फुटबल संघ (एन्फा) अन्तर्गतको खेलाडी संघको रोकिएको निर्वाचन मंगलबार हुने भएको छ ।

गत माघ २२ गतेलाई तय भएको खेलाडी संघको चुनाव मंगलबार हुने एन्फाका सह–महासचिव सन्जिव मिश्रले जानकारी गराए । खेलाडी संघको अध्यक्षका लागि पूर्व राष्ट्रिय खेलाडीद्वय राजेश मानन्धर र अनिल गुरुङ चुनावी मैदानमा छन् ।

त्यस्तै नवलपरासी जिल्ला फुटबल संघको निर्वाचन चैत १० गतेलाई तय भएको र मकवानपुरको निर्णय हुन बांकी रहेको सह–महासचिव मिश्रले बताए । भक्तपुरको भने भोलि सुनुवाई भएपछि निर्वाचन हुने वा नहुने निर्णय भोलि मंगलबार नै थाहा हुने मिश्रले बताए ।

एन्फाको चुनाव चैत १४ गते हुँदैछ । चुनाव नजिकिँदै गर्दा निर्वाचनमा होमिएका दुई पक्ष चुनाव आफ्नो पक्षमा पार्न देश दौडाहामा छन् । एन्फा निर्वाचन एक अध्यक्ष, ४ उपाध्यक्ष र ११ सदस्यको लागि निर्वाचन हुँदैछ । एक महिला सदस्यमा भने पेमा लामा निर्विरोध भएकी छन् ।

एन्फा अध्यक्षमा मणि कुवँर र कर्मा छिरिङ शेर्पा चुनावी मैदानमा छन् । चार उपाध्यक्षको लागि ९ जनाले उम्मेद्बारी दर्ता गराएका छन् । महासचिव र कोषाध्यक्ष भने निर्वाचित कार्यसमितिले चयन गर्नेछन् ।

निर्वाचनमा ४५ जिल्ला फुटबल संघबाट समान १, १४ ‘ए’ डिभिजन क्लबबाट समान १, ‘बी’ डिभिजन मध्येबाट ९, ‘सी’ डिभिजन क्लबबाट ५, महिला समिति, रेफ्री संघ, प्रशिक्षक संघ र खेलाडी संघबाट समान १ गरी ७७ मतदाता रहेका छन् ।