बार्सिलोना (एजेन्सी)– नेयमारले स्पेन फर्कन पर्दा पुनः बार्सिलोना फर्कने लियोन मेस्सीलाई वाचा गरेको समाचार प्रकाशित भएको छ । पेरिस सेन्ट जर्मेन (पिएसजी) पुगेको केहि समयपछि नै त्यहाँ खुसी हुन नसकेका नेयमार अर्को सिजन पुनः ला लिगामा फर्कने चर्चा सुरु भएको छ ।

उनी बार्सिलोना नभइ रियल म्याड्रिड फर्कन सक्ने उल्लेख गरिदै आएको छ । तर, नेयमारले रियल नभइ पुनः बार्सिलोनानै फर्कने वाचा गरेको उल्लेख गरिएको छ । बार्सिलोनाबाट गत वर्ष विश्व कीर्तिमान १ सय ८९ मिलियन पाउन्डमा ब्राजिलियन नेयमार पिएसजी पुगिेका थिए । २६ वर्षे स्टार नेयमार अहिले चोटमुक्त हुने प्रयासमा स्वदेशमा रहेका छन् ।

उच्च प्रदर्शनका साथ सिजनको सुरुआत गरेका नेयमारको पिएसजी च्याम्पियन्स लिगको अन्तिम १६ मा रियलसँग पराजित भएको थियो । चोटग्रस्त हुनुअघि नेयमारले पिएसजीबाट २९ गोल गरिसकेका छन् । बालोन डी ओर उपाधि जित्न पनि स्पेन फर्कनु पर्ने नेयमारले नै महसुस गरेको पनि बताइएको छ ।

रियलले सुरुवा प्रस्ताव गर्नुअघि नै बार्सिलोनाले राम्रो प्रस्ताव लान सके आफु पुनः पुरानै टोलीमा फर्कने नेयमारले मेस्सीलाई वचन दिएको समाचारमा उल्लेख गरिएको छ । नेयमारलाई पिएसजीबाट स्पेन फर्कन पुनः विश्व कीर्तिमान रकम प्रस्ताव गर्नुपर्ने हुन्छ ।

बार्सिलोनाले नेयमारमाथि चासो देखाइरहँदा रियलका अध्यक्ष फ्लोरेन्टिनो पेरेजले उनका एजेन्ट समेत रहेका पिता नेयमार सिनियरलाई भेटे समाचार सार्वजनिक भएको छ । अर्को सिजनको सुरुवातमै नेयमारको सरुवाका विषयमा छलफल भएको बताइएको छ ।