पुनरागमन पछिको तेस्रो उपाधि  

दिपक न्यौपाने

बुटवल – नेपाल पुलिस क्लबलाई २-० ले पराजित गर्दै रुस्लान थ्री स्टार क्लबले २० औं तिलोत्तमा गोल्डकपको उपाधि जितेको छ । घरेलु फुटबलमा लामो समय पछि फर्केको थ्री स्टारले पुनरागमन पछि तेस्रो उपाधि जितेको हो । यसअघि थ्री स्टारले इटहरी गोल्डकप र धरान बुढासुब्बा गोल्ड कप जितेको थियो । १६ औं आहा-रारा गोल्ड कपमा पुलिससँग फाइनलमा पराजित थ्री स्टार यसपटक भने बलियो देखिएको हो ।

तस्बिर : मनोज थापा

सेमिफाइनलमा आयोजक लाली रुपन्देहीलाई पराजित गरेको पुलिसले पहिलो हाफमा १५ औं मिनेटमा गोल गरेपनि  लिएपनि रवि पासवानको उक्त गोल रेफ्री कविन बेञ्जनकारले अफसाइड दिएका थिए ।

पहिलो हाफमा दुवै टोली सन्तुलित देखेपनि दोस्रो हाफमा थ्री स्टारले दुई गोल गर्न सफल भयो । खेलको ६४ औं मिनेटमा सुनिल बलको कर्नरमा निराजन खड्काको हेड क्रसबार माथिबाट बाहिरिएपछि अग्रता लिने अवसर गुमाएको थ्री स्टारले ६६ औं मिनेटमा रविन श्रेष्ठको आत्मघाती गोलबाट अग्रता पायो । विमल घर्ति मगरको क्रसलाई करिब १ वर्ष पछि चोटबाट मैदानमा फर्केका रविनले चेस्ट गर्दै पुलिसका किपर तर्फ दिएपनि पुलिसका गोल किपरबीचको तालमेलका कमीको कारण पुलिस खेलमा पछि पर्यो ।

पुलिसले ७६ औं मिनेटमा बराबरी गर्ने अवसर सिर्जना गरेपनि रवि पासवानले त्यो अवसर सदुपयोग गरेनन् । तेज तामाङको प्रहार थ्री स्टारका डिफेन्डरलाई लागेर फर्किएपछी पाएको अवसरमा रविले फितलो प्रहार गरे ।

थ्री स्टारले ७९औं मिनेटमा अग्रता दोब्बर गर्दै जित सुनिश्चित गर्यो । मिडफिल्डर सुनिलले प्रहार गरेको कर्नरमा हेड गर्दै कप्तान निराजन खड्काले टोलीलाई दोस्रो गोल दिलाए ।

खेलको हाइलाइट्स हेर्नुहोस