दिपक न्यौपाने
बुटवल – तिलोत्तमा गोल्डकप फुटबल प्रतियोगिताको २० औं संस्करणको फाइनल शनिबार हुँदैछ । देविनगरस्थित एन्फा टेक्निकल सेन्टरमा हुने फाइनलमा दुई ए डिभिजन टोली नेपाल पुलिस क्लब र रुस्लान थ्री स्टार क्लबबीच प्रतिस्पर्धा हुनेछ । दुवै टोली वर्षको तेस्रो उपाधिका लागि प्रतिस्पर्धा गर्दैछन् ।

यी दुई टोलीबीच यो वर्ष फाइनल हुन लागेको पनि तेस्रो प्रतियोगिता हो । माघमा एक साताबीच भएका दुई नकआउट प्रतियोगिताको फाइनल खेल्दा यी दुई टोलीले एउटा एउटा उपाधि जितेका थिए । माघ २० गते पोखरा आहा रारा गोल्ड कप र माघ २७ गते धरानमा २० औं बुढासुब्बा रेडबुल गोल्ड कपको फाइनल खेलेका थिए ।

जसमा पोखरामा पुलिसले उपाधि जितेको थियो भने थ्री स्टारले धरानमा आहा गोल्डकप जितेको थियो । त्यसयता यी दुई टोलीबीच पहिलो फाइनल हुँदैछ । रुपन्देही जिल्ला फुटबल संघको आयोजनामा जारी प्रतियोगिताको विजेताले ७ लाख ७७ हजार ७ सस ७७ रुपैयाँ तथा दोस्रो हुने टोलीले ४ लाख ४४ हजार ४ सय ४४ रुपैयाँ प्राप्त गर्नेछन् ।

आहा गोल्डकप जित्नुअघि थ्री स्टार मदन भण्डारी स्मृति इटहरी गोल्ड कप जितेको थियो भने पुलिसले माघको सुरुमा दाङमा राखेप च्याम्पियनसिपमा स्वर्ण पदक जितेको थियो । तिलोत्तमामा लक्ष्मी हुण्डाई मनाङ मस्याङदी क्लबलाई २–१ ले हराउँदै थ्री स्टारले फाइनल यात्रा तय गरेको थियो । पुलिसले बुधवार आयोजक लाली रुपन्देही ११ लाइ सडेन डेथमा पराजित गरेको थियो । तिलोत्तमामा भने पुलिसको इतिहास बलियो छ । पुलिसले ४ पटक उपाधि जित्दा थ्री स्टारले भने अहिले सम्म जित्न सकेको छैन ।