दिपक न्यौपाने

बुटवल – रुस्लान थ्री स्टार र नेपाल पुलिस क्लबमध्ये जुन टोलीले २० औं तिलोत्तमा गोल्डकप फुटबल प्रतियोगिताको उपाधि जिते पनि त्यो टोलीको वर्षको तेस्रो उपाधि हुनेछ । ए डिभिजनका स्थापित यी दुई टोलीबीच यो वर्ष फाइनल हुन लागेको पनि तेस्रो प्रतियोगिता हो ।

माघमा एक साताबीच भएका दुई नकआउट प्रतियोगिताको फाइनल खेल्दा यी दुई टोलीले एउटा एउटा उपाधि जितेका थिए । माघ २० गते पोखरा आहा रारा गोल्ड कप र माघ २७ गते धरानमा २० औं बुढासुब्बा रेडबुल गोल्ड कपको फाइनल खेलेका थिए । जसमा पोखरामा पुलिसले उपाधि जितेको थियो भने थ्री स्टारले धरानमा आहा गोल्डकप जितेको थियो ।

त्यसयता यी दुई टोलीबीच पहिलो फाइनल हुँदैछ । रुपन्देही जिल्ला फुटबल संघको आयोजनामा जारी प्रतियोगिताको विजेताले ७ लाख ७७ हजार ७ सय ७७ तथा दोस्रो हुने टोलीले ४ लाख ४४ हजार ४ सय ४४ रुपैयाँ प्राप्त गर्नेछन् । आहा गोल्डकप जित्नुअघि थ्री स्टार मदन भण्डारी स्मृति इटहरी गोल्ड कप जितेको थियो भने पुलिसले माघको सुरुमा दाङमा राखेप च्याम्पियनसिपमा स्वर्ण पदक जितेको थियो ।

तिलोत्तमामा लक्ष्मी हुण्डाई मनाङ मस्याङदी क्लबलाई २–१ ले हराउँदै थ्री स्टारले फाइनल यात्रा तय गरेको थियो । पुलिसले बुधवार आयोजक लाली रुपन्देही ११ लाइ सडेन डेथमा पराजित गरेको थियो । तिलोत्तमामा भने पुलिसको इतिहास बलियो छ । पुलिसले ४ पटक उपाधि जित्दा थ्री स्टारले भने अहिले सम्म जित्न सकेको छैन ।

फाइनलको अघिल्लो दिन शुक्रबार भएको पत्रकार सम्मेलनमा दुवै टोलीका प्रशिक्षकले उपाधि जित्ने विश्वास गरे । थ्री स्टारका प्रशिक्षक मेघराज केसीले पुलिससँग खेल्न कठिन भएपनि आफ्नो टोली बुटवलमा पहिलो पटक च्याम्पियन हुने आशा व्यक्त गरे । उनले खेलको परिस्थिति अनुसार रक्षात्मक वा आक्रमक हुने बताए ।

पुलिसका प्रशिक्षक अनन्तले दुवै टोलीको उपाधि जित्ने मौका बराबर भएपनि आफनो टोली तुलानात्मक रुपमा युवा टोली भएको बढी सम्भावना रहेको बताए । थ्री स्टारको कप्तानी अनुभव निराजन खड्काले गर्ने छन् भने एक वर्षपछि मैदान फर्केका अर्का अनुभवी खेलाडी रविन श्रेष्ठले पुलिसको कप्तानी गर्नेछन् ।

तिलोत्तमा गोल्ड कप

बुटवल नगरपालिकाले विस २०३१ सालमा स्थापना गरेको प्रतियोगिता २०३३ साल बाट सुरु भएको थियो । नेपालका ए डिभिजन क्लबसहित १० टोलीको सहभागिता रहेको प्रतियोगिताको पछिल्लो संस्करण सिएमजी क्लब संकटाले जितेको थियो । यसपटकको प्रतियोगिता सञ्चालनमा झन्डै ८७ लाख खर्च हुने रुपन्देही जिल्ला फुटबल संघका अध्यक्ष कुमार केसीले बताए । संघले फाइनलका लागि ३ सय र १ सय ५० रुपैयाँ टिकट दर तोकेको छ ।