दिपक न्यौपाने

बुटवल – लक्ष्मी हुन्डाई मनाङ मर्स्याङ्ग्दी क्लबलाई २-१ ले पराजित गर्दै रुस्लान थ्री स्टार क्लब २० औं तिलोत्तमा गोल्डकप फुटबल प्रतियोगिताको फाइनलमा पुगेको छ ।

तस्बिर : मनोज थापा

यो वर्ष थ्री स्टारसँगको तेस्रो भेटमा मनाङ तीन पटक नै पराजित भएको हो । माघ १३ गते मदन भण्डारी स्मृति इटहरी गोल्डकप फुटबल प्रतियोगिताको फाइनल खेलेका यी दुई टोलीको त्यसपछि चितवनमा भेट भएको थियो ।

डेढ वर्षपछि घरेलु फुटबलमा पुनरागमन गरेको थ्री स्टार क्लबको यो छैटौं फाइनल हुनेछ । यसघि ५ फाइनल खेलेको थ्री स्टारले २ मा उपाधि जित्न सफल भएको थियो ।

थ्री स्टारको जितमा बुद्ध चेम्जोङ र निराजन खड्काले गोल गरेका थिए । मनाङका लागि फ्लोरेन्टले २३ औं मिनेटमा हेड मार्फत गोल गर्दै अग्रता दिलाएपनि बुद्धले केहि बेरमा थ्री स्टारका लागि बराबरी गोल गरेका थिए । बुद्धको २४ औं मिनेटको हाफ भलीले मनाङका गोल किपर बिशाल श्रेष्ठलाई बिट गर्यो ।

थ्री स्टारले ३९ औं मिनेटमा कप्तान निराजन खड्काको गोल मार्फत अग्रता लियो । रेजिन धिमालको क्रसमा निराजनले हेडबाट गोल गरेका थिए ।

दोस्रो हाफमा गोल गर्ने प्रयास गरेपनि मनाङले केही सुवर्ण अवसरहरु गुमायो । खेलको ७७ औं मिनेटमा विमल राणाले ६ यार्ड बक्स नजिकबाट गोल गर्ने अवसर पाएपनि उनको प्रहारले थ्री स्टारका किपर एलेन न्यौपानेलाई बिट गर्न सकेन । त्यस्तै ८८ औं मिनेटमा विशाल राईले प्रहार गरेको फ्री किक पोस्ट माथिबाट बाहिरिएपछि थ्री स्टारको जित पक्का भएको हो ।

थ्री स्टारले शनिबार फाइनलमा नेपाल पुलिस क्लबको सामना गर्नेछ । यसअघि बुधबार सम्पन्न पहिलो सेमिफाइनलमा पुलिसले आयोजक लाली रुपन्देही ११ लाई सडन डेथमा हराउँदै फाइनलमा स्थान बनाएको थियो ।