दिपक न्यौपाने

बुटवल– घरेलु फुटबलका दुई चर्चित क्लब रुस्लान थ्री स्टार क्लब र लक्ष्मी हुन्डाई मनाङ मस्र्याङ्दी क्लब तीन साता नबित्दै अर्को नकआउट फुटबल प्रतियोगिताको सेमिफाइनलमा भिड्दैछन् । फागुन १७ गते चितवनमा १३ औं टुबोर्ग विकास रनिङ शिल्डको सेमिफाइनल खेलेका यी दुई टोली बिहीबार बुटवलमा २० औं तिलोत्तमा गोल्डकप फुटबल प्रतियोगिताको दोस्रो सेमिफाइनलमा भिड्दैछन् ।

समान २ उपाधि जितेका यी दुई टोलीबीच यो वर्ष भेट हुन लागेको यो तेस्रो पटक हो । अघिल्ला दुवै भेटमा थ्री स्टार विजयी भएको थियो । माघ १३ गते मदन भण्डारी स्मृति इटहरी गोल्डकप फुटबल प्रतियोगिताको फाइनल खेलेका यी दुई टोलीको त्यसपछि चितवनमा भेट भएको थियो ।

चितवनमा पनि थ्री स्टार विजयी भएको थियो । तर, फाइनलमा भने टोली एपिएफसँग पराजित भएको थियो । डेढ वर्षपछि घरेलु फुटबलमा पुनरागमन गर्दै पहिलो उपाधि जित्दा थ्री स्टारले इटहरीमा मनाङलाई हराएको थियो । मनाङ भने त्यसपछिका कुनै पनि नकआउट प्रतियोगितामा फाइनल पुग्न सकेको छैन ।

थ्री स्टारले भने इटहरीसहित लगातार ४ वटा नकआउट फुटबल प्रतियोगिताको फाइनल खेल्यो । जसमा इटहरी र धरानको बुढासुब्बा रेडबुल गोल्डकपको उपाधि जित्यो । पुनरागमनपछिको दसौं प्रतियोगिता खेलिरहेको थ्री स्टार र मनाङ दुवैले हेटौंडामा भने राम्रो नतिजा निकाल्न सकेनन् ।

मनाङ इटहरीपछि पोखराको आहा रारा गोल्डकप, बुढासुब्बामा पनि धेरै अघि बढ्न सकेन । भर्खरै झापा गोल्डकपमा दुवै टोली सेमिफाइनल भन्दा अघि बढ्न सकेनन् । कुनै समयमा राजधानीमा यी दुई टोली दशरथ रंगशालामा उत्रदा त्रिुपरेश्वरमा दर्शकको ठूलो घुइचो लाग्ने गरेको थियो ।

मनाङ र थ्री स्टार दुवै वर्षको तेस्रो उपाधिको खोजीमा छन् । मनाङ र थ्री स्टाररसँगै यो सिजन नेपाल पुलिस क्लबले समान २ उपाधि जित्दा त्रिभुवन आर्मी क्लबले भने ७ वटा नकआउट उपाधि जितिसकेको छ । मनाङले चितवनमै जेसिज कप र दुवही गोल्डकपको उपाधि जितेपछि तीन वटा फाइनल गुमाएको थियो । जसमा सताक्षी गोल्डकप, मेत्री नेत्रालय काकररभिट्टा गोल्डकप र इटहरी गोल्ड कप छन् । बाँकी प्रतियोगितामा टोली धेरै अघि बढ्न सकेन ।

थ्री स्टार र मनाङबीचको विजेताले शनिबार नेपाल पुलिस क्लबको सामना गर्नेछ । आयोजक लाली रुपन्देही ११ लाई बुधबार सडन डेथमा हराउँदै पुलिस तिलोत्तमा गोल्डकपको फाइनलमा पुगेको विजेता । प्रतियोतिगाको विजेताले ७ लाख ७७ हजार ७ सय ७७ रुपैयाँ प्राप्त गर्नेछ ।