बार्सिलोना (एजेन्सी) – आज राति च्याम्पियन्स लिग अन्तिम १६ को दोस्रो लेगमा बार्सिलोना र चेल्सी नु क्याम्पमा भिड्दै छन् । स्ट्यामफोर्ड ब्रिजमा खेलिएको पहिलो लेग १-१ को बराबरीमा सकिएको थियो ।

घरेलु लिगमा बार्सिलोनाका स्टार खेलाडी लियोनल मेस्सीले पारिवारिक कारणले मालागाविरुद्धको खेल गुमाएका थिए । आज भने मेस्सी पुन: बार्सिलोनाको अग्रपंक्ति सम्हाल्न टोलीमा फर्किने छन् । बार्सिलोनाका लागि मिडफिल्डमा आज केहि समस्या देखिन सक्छ । आन्द्रेस इनिएस्टा खेल्ने निश्चित छैन भने अर्का मिडफिल्डर फिलिप कौटिन्हो च्याम्पियन्स लिगमा टोलीको हिस्सा हुन पाउने छैनन् । त्यसैगरी पौलिन्हो र उस्माने डेम्बेलेमध्ये एक खेलाडीले मिडफिल्डको दायाँतिर स्थान पाउने देखिएको छ ।

अर्को तर्फ चेल्सीको अग्रपंक्ति केहि कम्जोर देखिएको छ । एल्भारो मोराटा र ओलिभियर जिरुडगरी दुई स्ट्राइकर भए पनि विंगर एडेन हाजार्डलाई अग्रपंक्तिमा खेलाउने सम्भावना रहेको छ । त्यसैगरी प्रशिक्षक एन्टोनियो कोन्टे द्यानी ड्रिन्कवाटर र सेस्क फ्याब्रिग्यासमध्ये कसलाई मिडफिल्डमा खेलाउने दोधारमा छन् । बार्सिलोना फ्याब्रिग्यासको पूर्व क्लब हो तर ड्रिन्कवाटर अलि पक्षात्मक खेलाडी भएकाले उनले नै टोलीमा स्थान पाउने अनुमान गरिएको छ ।

बार्सिलोना विरुद्ध पछिल्ला ९ खेलमा चेल्सी पराजित भएको छैन भने च्याम्पियन्स लिगको पछिल्लो ८ खेलमा बार्सिलोना पनि अपराजित रहेको छ । बार्सिलोनासँग एक ‘अवे’ गोलको फाइदा पनि रहेको छ । आजको खेल नेपाली समय अनुसार १.३० बजे सुरु हुने छ ।