तिलोत्तमा गोल्ड कप सेमिफाइनल – पुलिस आयोजक रुपन्देहीसँग भिड्दै

दिपक न्यौपाने
बटुवल – देविनगरस्थित एन्फा टेक्निकल सेन्टरमा जारी २० औं तिलोत्तमा गोल्डकप फुटबल प्रतियोगितामा नेपाल पुलिस क्लब र आयोजक लाली रुपन्देही ११ बीच पहिलो सेमिफाइनल खेल हुँदैछ । आयोजक टोली यसपटक दुई खेल जित्दै अन्तिम चारमा पुगेको थियो भने पुलिसले अर्को विभागिय टोली नेपाल एपिएफ क्लबको चुनौतिलाई समाप्त पारेको थियो ।

लाली रुपन्देही ११ । फाइल तस्बिर

यो सिजन सन्तोषजन प्रदर्शन गर्न नसकेको रुपन्देहीले तिलोत्तममाको पहिलो खेलमा सुदूरपश्चिम ११ लाई २–० ले हराएको थियो । त्यस्तै अर्को खेलमा नवलपरासी ११ लाई ३–१ ले हराउँदै रुपन्देहीले सेमिफाइनल यात्रा तय गरेको थियो ।

सोझै क्वार्टरफाइनल खेलेका दुई विभागिय टोलीको प्रतिस्पर्धामा पुलिसले एपिएफलाई १–० ले हराएको हो । पुलिसले यो सिजन दुई उपाधि जितेको छ । माघको सुरुआतमा राखेप च्याम्पियनसिपमा स्वर्ण पदक जितेको पुलिसले पोखरामा आहा रारा गोल्डकपको उपाधि जितेको थियो ।

आजको खेलको विजेताले रुस्लान थ्री स्टार क्लब र लक्ष्मी हुन्डाई मनाङ मस्र्याङ्दी क्लबमध्ये एक टोलीसँग फाइनल खेल्नेछ । तिलोत्तमाको विजेताले उपाधिसहित ७ लाख ७७ हजार ७ सय ७७ रुपैयाँ प्राप्त गर्नेछ ।