म्यानचेस्टर (एजेन्सी)– म्यानचेस्टर युनाइटेड च्याम्पियन्स लिगको अन्तिम १६ बाट बाहिरिनु कुनै नौलो विषय नभएको प्रशिक्षक जोसे माउरिन्होले बताएका छन् । सेभियासँग मंगलबार २–१ ले पराजित हुँदै यनाइटेड च्याम्पियन्स लिगबाट बाहिरिएको छ ।

विसमन बेन येडरले सेभियाका लागि २ गोल गरेको खेलमा घरेलु मैदानमा युनाइटेडका लागि रोमेलु लुकाकुले सान्त्वना गोल फर्काएका थिए । पहिलो लेग गोलरहित बराबरी र गए रातीको हारसँगै युनाइटेडको यात्रा टुंगिएको छ । मौरिन्होले यसअघिका उदाहरण पेश गरेका छन् ।

प्रशिक्षकका रुपमा सन् २००४ मा मौरिन्होको टोली पोर्टोले युनाइटेडलाई हराएको थियो । त्यस्तै उनकै प्रशिक्षणमा रहेको रियल म्याड्रिडले २०१२/१३ मा पनि युनाइटेडलाई हराएको थियो । युनाइटेडका तत्कालिन प्रशिक्षक सर एलेक्स फर्गुसनको क्लबमा त्यो अन्तिम सिजन थियो ।

५५ वर्षे पोर्चुगिज प्रशिक्षकले यसअघि पनि दुई पटक क्लबले यस्तो हार बेहोरिसकेको स्मरण गरे । ‘यसअघि म दुई पटक यो कुर्सीमा बसेको छु । पोर्टोसँग हुँदा युनाइटेड बाहिर भएको थियो । रियलसँग हुँदा पनि युनाइटेड बाहिरिएको थियो,’ उनले भने, ‘त्यसैले यो युनाइटेडका लागि नयाँ विषय होइन ।’

फर्गुसनको सन्यासपछि युनाइटेडलाई च्याम्पियन्स लिगको नकआउट चरणमा पुर्याउन नसक्ने दुई प्रशिक्षक मध्ये मौरिन्हो एक हुन् । लुइस भान गालले आफ्नो कार्यकालको दोस्रो सिजन टोलीलाई समूह चरण पार गराउन सकेका थिएनन् । फर्गुसनपछि डेभिड मोयसले भने टोलीलाई च्याम्पियन्स लिगमा पुर्याएका थिए ।