बार्सिलोना (एजेन्सी)– ला लिगाको शीर्ष टोली बार्सिलोनाको बोर्ड अफ डाइरेक्टरले टोलीका पूर्व स्टार नेयमारलाई पुनः क्लबमा ल्याउने कुनै सम्भावना नरहेको बताएको छ । सिजनको सुरुवातमा नेयमार बार्सिलोना छाडेर पेरिस सेन्ट जर्मेन(पिएसजी) पुगेका थिए ।

बार्सिलोना बोर्डका प्रवक्ता जोसेप भिभ्सले क्लबले नेयमारसँग पुनः सम्झौता गर्ने भन्ने विषय हल्ला मात्र भएको प्रष्ट पारेका छन् । नेयमार पिएसजीमा खुसी नरहेको उल्लेख नरहेको सुरुवातबाट चर्चा चल्दै आएको छ ।

उनले पछिल्लो पटक कुराकानीका क्रममा बार्सिलोनाका इभान राकटिक र फिलिप्पे काउटिन्होसँग पनि पिएसजीमा खुसी नरहेको बताएको जसका कारण उनी पुनः बार्सिलोना फर्कने चर्चा सुरु भएको थियो । नेयमार अहिले चोटमुक्त हुने प्रयासमा रहेका छन् ।

भिभ्सले पछिल्ला हल्लाका बारेमा भने, ‘नेयमार पुनः बार्सिलोना फर्कने भन्ने विषय हल्ला मात्र हो । ब्राजिलियन खेलाडीले क्लब छाडिसकेका छन्, उनी जाने बेलामा हामीले शुभकामना दिएका थियौं ।’

भिभ्सले थपे, ‘उनी गएयता त्यस्तो केही भएको छैन । कोही खेलाडीका बारेमा हुने अनुमानको बहसमा हामी पर्न चाहदैनौं ।’ यसैबीच, पिएसजीका अध्यक्ष नासिर अल खलिफा नेयमारलाई भेट्नका लागि ब्राजिल गएको बताइएको छ । यद्दपी क्लबले उनी व्यवसायिक र च्यारिटीका प्रायोजनका लागि ब्राजिल पुगेको बताएको छ ।