काठमाडौं (हाम्रो खेलकुद) – स्कलर्स होम एकेडेमीका खेलाडीले नेपालको प्रतिनिधित्व गर्दै स्पेनमा आयोजना हुने डोनोष्टी कपअन्तर्राष्ट्रिय फुटबल प्रतियोगितामा सहभागिता जनाउने भएका छन् ।

डोनोष्टी कप अन्तर्राष्ट्रिय फुटबल प्रतियोगिता यही जुलाई १ तारिख देखि ८ तारिखसम्म स्पेनको सनसेवेस्टायनमा हुदैछ । नेपालको प्रतिनिधित्व गर्दै स्कलर्स होम एकेडेमीको टिमले यु–१३ र यु–१४ पुरुष उमेर समूहमा प्रतिस्पर्धा गर्नेछन् ।

डोनोष्टी कपमा पाँच महादेशका ५७ राष्ट्रबाट ५०० भन्दा बढी खेलाडीको सहभागिता रहनेछ । उक्त प्रतियोगितामा यु–१०, यु–११, यु–१२, यु–१३, यु–१४, यु–१५, यु–१६, यु–१७ र यु–१८ मा महिला र पुरुष दुवैमा स्पर्धा हुनेछ ।

१८ खेलाडी सहित २० सदस्यीय नेपाली टोली जुन ३० मा त्यसतर्फ प्रस्थान गर्नेछ । स्कलर्स होमको कप्तानी अनुज पौडेलले गर्नेछन् । प्रशिक्षकमा भरत लामा रहेका छन् ।

यस्तै नेपालका अति गरिब विद्यार्थीहरुको पाँच कोटा पनि रहेको स्कलर्स होम एकेडेमीका प्रिन्सिपल हरि नारायण उपाध्यायले बताए । प्रतियोगितामा लाग्ने सबै खर्च आयोजकले नै बेहोर्ने प्रिन्सिपल उपाध्यायले बताए ।

उनले खेलाडी छनोट क्षमता, रुचि र उमेर अनुसार खेलाडी छनोट गरिएको बताए । उनीहरुले विगत ८ महिना देखि निरन्तर प्रशिक्षण समेत गरेको उनले जानकारी गराए ।