युनाइटेड (एजेन्सी)– गोलकिपर डेभिड डे गेया युरोपियन च्याम्पियन रियल म्याड्रिड जाने सम्भावनामा म्यानचेस्टर युनाइटेडका प्रशिक्षक जोसे मौरिन्होलेले पुनः चिसो पानी खन्याईदिएका छन् । नयाँ गोलकिपरको खोजीमा रहेको रियल लामो समयदेखि डे गेयालाई भित्राउन इच्छुक छ ।

एक समय रियल र डे गेयाबीच सम्झौताको एकदमै सम्भावना रहँदा प्राविधक कारणले रोकिएको थियो । सन् २०१५ मा सुरुवा बजारको अन्तिम दिन फ्याक्स मेसिनले धोका दिदा सम्झौता हुन सकेको थिएन । त्यसपछि पछि रियलले उनलाई लाने बारम्बार प्रयास गरेको हो । नयाँ सिजनका लागि पनि क्लबले उनलाई भित्राउन प्रयास गरेको बताइएको छ ।

यद्दपी रियलका पूर्व प्रशिक्षक समेत रहेका मौरिन्होलेले सम्झौताको सम्भावना कम रहेको बताएका छन् । ‘मलाई लाग्छ उनी यहि रहनेछन् ।,’ उनले भने, ‘ यदि म त्यहाँ हुन्थे भने म अर्को खेलाडीको लागि प्रयास गर्थे ।’

रियलले अर्को खेलाडीका रुपमा चेल्सीका गोलकिपर थिबाउ कोर्टुवालाई लिन चाहेको बताइएको छ । अब मौरिन्होलेको भनाईले गोलकिपर सरुवामा कति प्रभाव पार्न सक्छ त्यो भने हेर्न बाँकी छ । सेभिल्लासँग च्याम्पियन्स लिग अन्तिम १६ को दोस्रो लेग अघि मौरिन्होलेले आफ्नो टोली च्याम्पियन्स लिगको दाबेदार नभएको बताएका छन् ।

उनले भने, ‘मलाई लाग्दैन हामी च्याम्पियन्स लिगका दाबेदार मध्येका हौं ।’ यी दुई टोलीबीचको पहिलो लेग गोलरहित बराबरीमा टुंगिएको थियो । घरेलु मैदानमा आज राती हुने खेलमा सहज जितका साथ युनाइटेड अघि बढ्ने अपेक्षा गरिएको छ । सेभिल्लाविरुद्धको पहिलो लेगमा गोलकिपर डे गेयाले उच्च प्रदर्शन गरेका थिए ।