लन्डन (एजेन्सी)– लियोनल मेस्सीसहित पूर्व क्लब बार्सिलोनाका अन्य सहकर्मीको सामना गर्नका लागि चेल्सीका सेस्क फ्याब्रिग्यास उत्साहित भएका छन् । यद्दपी बार्सिलोनाविरुद्ध गोल गर्न सफल भएको खण्डमा खुसीयाली मनाउने वा नमाउने विषयमा भने उनले निर्णय गरेका छैनन् । फाब्रिगासले आफ्नो पुरानो क्लबविरुद्ध खेल्न कुनै समस्या नरहेको पनि बताएका छन् ।

“आर्सनलमा हुँदा पनि यस्तो भइसकेको छ । अहिले चेल्सीबाट हुँदैछ । यो दुवै अवसरमा मलाई खुसी लागेको छ,” उनले भने, “मलाई आफ्नो पुरानो क्लब र पुराना साथीसँगै खेल्न कुनै अप्ठेरो छैन । यसले म झन उत्साहित हुनेछु ।”

 मेस्सीसँग खेल्ने विषयमा फाब्रिगासले भने, “म भाग्यमानी रहे भने पुरा खेल्न पाउनेछु । यदि खेल्न पाए भने मैदानमा अधिकांश समय हामी सँगै हुन सक्छौं । उनलाई रोक्न सहज हुने छैन । म आफ्नो तर्फबाट उनलाई असहज पार्न कोशिस गर्ने छु । जसले उनीहरुलाई राम्रो प्रदर्शन गर्न कठिन होस् ।”

एउटा प्रतिद्वन्द्वीका रुपमा मेस्सी जहिले पनि जित्न चाहने खेलाडीका रुपमा आफुले पाएको उल्लेख गर्दे फेब्रिगासले आफु पनि उनीसँग खेल्दा त्यस्तै हुन चाहेको बताए । “हामी अहिले फरक टोलीमा छौं । हरेक खेलाडी आफुले राम्रो गर्दै टोलीलाई जिताउन चाहन्छ,” उनले भने, “हामीले एकअर्काको सम्मान पनि गर्नुपर्दछ ।”

उनले पुरानो टोलीसँग खेल्दा बेग्लै अनुभव हुने पनि सुनाए । “म खुसीयाली मनाउन सक्दिन भन्दिन । तर पनि म खुसी हुने छु,” फ्याब्रिग्यासले थपे, “यस्तो मौका जीवनमा सधै आउदैन । म खेल्न चाहन्छु र मेरो पोजिसन केहि विशेष र फरक रहेकोबारे  प्रशिक्षक एन्टोनियो कोन्टेले पनि जनाएका छन् ।  म खेल्न चाहन्छु र अहिले त्योबाहेक धेरै सोचेको छैन ।”

च्याम्पियन्स लिगको अन्तिम १६ को पहिलो लेगमा बार्सिलोना र चेल्सी १–१ को बराबरीमा रोकिएका थिए । यद्दपी दोस्रो लेगमा बार्सिलोनालाई सम्भावना बढी भएको टोलीका रुपमा हेरिएको छ । यी दुईबीचको खेल बुधबार राति हुँदैछ ।