म्याड्रिड (एजेन्सी)– रियल म्याड्रिडका विवादस्पद स्ट्राइकर करिम बेन्जेमाको क्लबमा यो अन्तिम सिजन हुन सक्ने सम्भावना बढेको छ । रियलका अध्यक्ष फ्लोरेन्टिनो पेरेजले अर्को सिजन सम्झौता नविकरण गर्न नचाहेका ६ खेलाडीमध्ये बेन्जेमा पनि रहेको बताइएकाले उनको यात्रा यहि सिजन सम्म मात्र रहने अनुमान गरिएको छ ।

समर्थकका बीचमा अलोकप्रिय बेन्जेमाको प्रदर्शन पनि खासै सन्तोषजनक हुन सकेको छैन । च्याम्पियन्स लिगमा पेरिस सेन्ट जर्मेनविरुद्धको खेलमा पनि उनको प्रदर्शन अपेक्षा अनुसार हुन नसकेपछि बेन्जेमाको भविष्यका विषमा फेरि चर्चा सुरु भएको बताइएको छ ।

यो सिजन सबै खाले प्रतियोगितामा गरि ८ गोल गरेका बेन्जेमाले ला लिगामा ४ गोल मात्र गर्न सकेका छन् । ला लिगाको साविक विजेता रहेको रियलको यो सिजन राम्रो हुन सकेको छैन । शीर्षस्थानको बार्सिलोनाभन्दा १५ अंकले पछि रहेको रियल शहरी प्रतिद्वन्द्वी एट्लेटिको म्याड्रिड भन्दा पनि पछाडी रहेको छ ।

अध्यक्ष पेरेज नयाँ सिजनमा युवा खेलाडीलाई क्लबमा ल्याउन चाहि रहेका छन् । आउने सिजन रियलले ठूलो रकम खेलाडीका लागि खर्च गर्ने अपेक्षा गरिएको छ । फ्रान्सेली बेन्जेमासहित ६ खेलाडी रियलले राख्न नचाहेको बुझिएको छ । नयाँ सिजनमा क्लबले रोबेर्टे लेवान्डोवस्की, हेरी केन, इडन हाजार्ड, माउरो मोहम्मद साहेल जस्ता खेलाडीलाई क्लब भित्राउन प्रयास गर्ने अनुमान गरिएको छ ।