बिर्तामोड (हाम्रो खेलकुद) – आज सम्पन्न झापा गोल्डकपमा नेपाल त्रिभुवन आर्मी क्लबले रमपम झापा ११ लाई सडेन डेथमा ८-७ ले हराएको छ । सो जितसँगै आर्मीले सिजनको सातौं उपाधि हात पारेको छ ।

निर्धारित समयमा झापाका लागि कर्ण लिम्बु र आर्मीका लागि भरत खवासले गोल गरेका थिए । निर्धारित समय र त्यसपश्चात अतिरिक्त समय १-१ को बराबरीमा टुङ्गिएपछि खेल पेनाल्टीमा पुगेको थियो । सडेन डेथको दशौं प्रहारमा झापाका गोलकिपर किशोर गिरी चुके भने आर्मीका टंक बस्नेतले आफ्नो प्रहारलाई परिणत गर्दै उपाधि सुनिश्चित गरेका हुन् ।

प्रतियोगिताका सर्वोत्कृष्ट खेलाडी झापा ११ का योगेश गुरुङ घोषित भए । उनले पुरस्कारस्वरुप मोटरसाइकल प्राप्त गरेका छन् । झापाका कर्ण लिम्बु उच्च गोलकर्ता घोषित हुँदै ५१ हजार नगद प्राप्त गरे । त्यस्तै फाइनल खेलका म्यान अफ द म्याच विश्वास श्रेष्ठले २५ हजार नगद पुरस्कार हात पारे । पोखराको सहारा क्लबले फेयर प्लेको उपाधि जित्न सफल भयो ।

त्यस्तै अन्य विधामा उत्कृष्ट खेलाडी तथा प्रशिक्षकले ३१ हजार नगद प्राप्त गरे :

उत्कृष्ट गोलकिपर: विकेश कुथु (आर्मी)

उत्कृष्ट रक्षक: देवेन्द्र तामाङ (झापा)

उत्कृष्ट मिडफिल्डर: सन्तोष तामाङ (आर्मी)

उत्कृष्ट प्रशिक्षक: चुन बहादुर थापा (आर्मी)

उच्च गोलकर्ता : कर्ण लिम्बु (झापा)

फेयर प्ले : सहारा क्लब, पोखरा